Sanjar Asfendiiarov atyndaǵy Qazaq ulttyq meditsina ýniversiteti juqpaly jáne tropikalyq aýrýlar kafedrasynyń assistenti Lázzat Ómeshova koronavirýsqa qarsy vaktsinatsiianyń mańyzy týraly aitty, dep habarlaidy QazAqparat.
Onyń aitýysha, COVID-19 - virýstyq infektsiia. Sondyqtan vaktsina koronavirýs infektsiiasyna qarsy kúreste jaǵdaidy jaqsartýǵa kómektesedi.
Sonymen qatar, Lázzat Ómeshova álemdegi epidemiialyq jaǵdaidyń nasharlaýy men koronavirýs infektsiiasynyń jańa shtammynyń taralýy aiasynda halyqty KVI-ge qarsy vaktsinalaýdyń mańyzyn atap ótti.
«Ulybritaniiada koronavirýstyń jańa shtammy bar, ol agressivti túrde ótýde. Bizdiń eldegi virýs osy deńgeige deiin mýtatsiiaǵa ushyrai ma, joq pa degen suraqqa jaýap berýge qinalamyn, biraq bizdiń respýblikamyzǵa bul shtammdy Eýropadan óz azamattarymyz ákelýi múmkin, óitkeni qazirgi koronavirýspen de basynda osyndai jaǵdai bolǵan», - dedi ol.
Sonymen qatar, ol aldyn alýdyń negizgi erejelerin saqtaýdy jalǵastyrý mańyzdy ekenin tilge tiek etti.
Qazirgi ýaqytta negizgi aldyn alý sharalary mynandai:
- maska rejimi (durys kiiý jáne aýystyrý rejimin saqtaý);
- qoldy jii jýý jáne dezinfektsiialaý arqyly jeke gigienany saqtaý;
- 1,5 metrden kem emes qashyqtyqty saqtaý;
- adam kóp jinalatyn jerlerden aýlaq bolý;
- COVID-19 rastalǵan adamdardy oqshaýlaý.
Sarapshynyń sózine sensek, halyqty tumaýǵa qarsy vaktsinatsiialaý sheshimi aitarlyqtai nátije berdi.
«Tumaý - aýyr respiratorlyq virýstyq infektsiia, ol intoksikatsiianyń aiqyn belgilerimen júredi, al sońǵy jyldary pandemiialyq tumaý jaǵdailary tirkeldi. Bul da aýyr virýstyq pnevmoniiany týǵyzady. Meniń oiymsha, memlekettiń tumaýǵa qarsy vaktsinatsiiaǵa kóp qarajat bólgeni durys boldy. Eger adamdar tumaýmen qosa koronavirýspen de aýyrsa, ne bolar edi?! Elestetip kórińizshi», - dedi Lázzat Ómeshova.
Eske salaiyq, Almaty qalasynyń ákimi Baqytjan Saǵyntaevtyń tapsyrmasy boiynsha tumaý virýsy taralýynyń aldyn alý úshin jergilikti biýdjetten táýekel tobyndaǵy adamdardy tegin vaktsinalaý úshin «Grippol Pliýs» vaktsinasynyń 430 000 dozasy satyp alynǵan bolatyn.
