Vaktsinatsiianyń baiaý qarqyny koronavirýs juqtyrǵandar sanynyń odan saiyn artýyna ákelýi múmkin. Vaktsina virýs mýtatsiiasynyń aldyn alady. Bul týraly Almaty qalasy №8 emhananyń bas dárigeri Farida Aǵybaeva habarlady.
Emhananyń bas dárigeri ekpe alǵannan keiin COVID-19 immýniteti qalai damitynyn jáne eki komponentti alýdyń mańyzyn aitty.
Onyń aitýynsha, vaktsinany alǵannan keiin adam aǵzasy vaktsinamen tanysady jáne immýndyq jasýshalardyń eki túriniń jumysyn bastaidy: V jáne T-jasýshalary.
«V-jasýshalary antideneni belsendi túrde qalyptastyrady, biraq vaktsinanyń ekinshi dozasynsyz bul immýnoglobýlinderdiń mólsheri birneshe aptadan keiin kúrt tómendeidi. T-limfotsitter-immýndyq júieniń negizgi qarýy. Dál osy T-jasýshalar qaýipti taýyp, qozdyrǵyshty joiady. T-jasýshalarynyń negizgi máselesi – vaktsinatsiianyń birinshi kezeńinen keiin immýndyq júie T-limfotsitterdiń óte az mólsherin jasaidy, al aǵza virýsty qabyldaýǵa daiyn emes kúiinde qalady», - dep túsindirdi F. Aǵybaeva.
Sondyqtan immýndyq reaktsiianyń qalǵan bóligin iske qosý úshin vaktsinanyń ekinshi dozasyn alý qajet.
«Qazirgi kezde COVID-19 vaktsinalaryna júrgizilgen úlken meditsinalyq zertteýlerdiń nátijeleri kórsetkendei, ekinshi doza qorǵanys dárejesin birneshe ese arttyrady. Izrail ǵalymdary koronavirýs vaktsinasynyń eki dozasyn da qabyldaǵan patsientterde qorǵanys 6-12 ese joǵary degen qorytyndyǵa keldi. Osylaisha, biz vaktsinanyń ekinshi kezeńi senimdi qorǵanys úshin asa mańyzdy ekenin kóremiz», - dedi emhananyń bas dárigeri.
Koronavirýsqa qarsy vaktsinany 21 kún aralyqpen eki kezeńde alý kerek.
Birinshi doza antideneniń az mólsherin óndirýge bailanysty turaqty qorǵanys áserin qamtamasyz etpeidi.
Ekinshi doza birinshisiniń áserin kúsheitedi jáne bekitedi, adam aǵzasyndaǵy antidene mólsheri artady.
Almatynyń №8 emhanasy da úsh ekpe bólmesi bar ári úsh mobildi top jumys isteidi. Ekpe salýdy vaktsinalaýǵa ruqsaty bar 36 meditsinalyq qyzmetkerden turatyn alty brigada júrgizedi.
«Emhanada ekpe egov.kz portaly men tirkelý arqyly aldyn ala jazylyp, sondai-aq kezek boiynsha, úzilissiz jáne demalys kúnderi saǵat 8.00-den 20.00-ge deiin júrgiziledi», - dedi F. Aǵybaeva.
Emhananyń egý pýnkteriniń jalpy ótkizý qabileti - táýligine 300-400 adam. Búginde munda 26 235 adam ekpe aldy.
