Meditsina ǵylymdarynyń doktory Botagóz Káýkenova koronfvirýsqa qarsy vaktsinanyń 1 jáne 2 komponentin egý aralyǵyn uzartýǵa qarsy ekendigin aitty, dep habarlaidy QazAqparat.
«Biz ustanymyzdy bildirdik jáne bas memlekettik sanitar dárigerdiń jańa qaýlysyna qarsymyz. Qarsy bolýymyzdyń sebebi, eń aldymen 45 kún degen min esh jerde, eshbir málimdemede joq. Gamaleia atyndaǵy ortalyq direktory Gintsbýrgtiń hatynda aralyqtyń 21 kúnnen 90 kúnge deiin ulǵaitylýy múmkin ekeni kórsetilgen. Iaǵni, adamdardyń tańdaýy bar. Eger olar úlgermese, bir jaqqa ketip qalsa, onda vaktsinatsiiany keiinge qaldyra alady. Birinshi komponent egilgennen keiin ekinshi komponentti 45 kúnde egý týraly sheshim adamdardy uzaq ýaqyt boiy qorǵanyssyz qaldyrady», - dedi ol Experts Hub Kazakhstan jobasy sarapshylarynyń dóńgelek ústeli barysynda.
Onyń atap ótýinshe, birinshi dozany alǵannan keiin 2 apta ótken soń adam aǵzasynda immýnitettiń jetkilikti qorǵanysy paida bolady.
«Birinshi men ekinshi dozanyń arasynda 45 kún kútýge týra keledi. Buǵan qosa, jetkilikti qorǵanys alý úshin taǵy eki aptany qosyńyz. Birinshi dozadan keiin aýyryp qalǵandardyń sanyn eskeretin bolsaq, munyń barlyǵy adamdardyń vaktsinatsiia baǵdarlamasyna degen senimin joǵaltady», - dedi Botagóz Káýkenova.
Sondyqtan ol adamdarǵa birinshi dozany alǵannan keiin 21-shi kúnde nemese keiinirek alý múmkindigin berý qajettigin aitady.
Al meditsina ǵylymdarynyń doktory Lázzat Eralieva mundai pikirmen kelispei, eki doza aralyǵyn 90 kúnge sozýdyń esh qaýpi joq ekendigine nazar aýdartady.
«Antidene deńgeii ýaqyt óte arta túsedi. 21 kúnnen keiin 1 deńgei, bir aidan soń basqa deńgei bolady. Aralyqty 90 kúnge deiin sozýdyń esh qorqynyshy joq. Siz qorǵanysta bolasyz, óitkeni birinshi vaktsinany aldyńyz. Sizde birinshi dozadan keiin qalyptasqan antideneniń jetkilikti deńgeii bolady. Sodan keiin 90 kúnniń ishinde ekinshi dozany alasyz», - dedi Lázzat Eralieva.
