Áleýmettik jeliler men messendjerlerde keibir vaktsinalar quramyndaǵy aliýminii oksidteri men tuzdarynyń ziiany týraly beinerolik taratylýda. Mundai adiývant Altsgeimer, aýtizm jáne basqa da aýrýlar týdyrmaq-mys. Shyndyǵynda, buǵan eshqandai dálel joq. Bul týraly stopfake.kz saity habarlady.
Videoda vaktsinalardaǵy aliýminii adamdar úshin qaýipti jáne birqatar aýrýlardy týdyratyny týraly maqalalardyń avtory doktor Kristofer Shoýdyń sóilegen sózinen úzindiler keltirilgen.
«Shoýdyń osy máselege arnalǵan alǵashqy maqalasy 2011 jyly jaryq kórdi, sodan keiin basqa dárigerler men mamandar tarapynan úlken synǵa ushyrady.
2017 jyly K.Shoý óz zertteýiniń durys emes ekenin jáne berilgen málimetter ózgertilip, manipýliatsiiaǵa beiim ekendigin moiyndady.
Bul oqiǵa jalpy Shoýdyń mansabyna kóleńke túsirdi, adamdardyń kóbi ǵalymnyń málimdemesine mán berý kerek pe dep oilanyp qaldy», - delingen stopfake.kz saitynda.
Málim etilgendei, shyn máninde, amorfty aliýminii gidroksifosfat sýlfaty, aliýminii gidroksidi, aliýminii fosfaty jáne kalii aliýminii sýlfaty 1930 jyldardan bastap vaktsinalarda adiývant retinde qoldanylyp keledi. Mundai preparattardyń qaýipsizdigi men tiimdiligi dáleldengen. Al vaktsina alǵannan keiin Altsgeimer aýrýy nemese aýtizmniń paida bolýy týraly jaǵdailar tirkelgen joq.
«Aliýminii Altsgeimer qaýpin arttyrady degen ideia burynnan bar, doktor Shoýdyń zertteýi jariialanǵanǵa deiin de bolǵan. Metaldar men aýrýlardyń bailanysy týraly boljamdar alǵash ret 1965 jyly aityldy. Ol kezde aliýminii ydysta daiyndalǵan tamaq pen sýdaǵy metall miǵa túsip, ony buzady dep sanaldy.Alaida, odan ári zertteý barysynda bul teoriia rastalmady. Ǵalymdar saý adamdardyń miynan aliýminii bólshekterin tapty, bul metall Altsgeimer aýrýyn týdyrýy múmkin degen boljamdy joqqa shyǵardy», - dep jazady sait.
Keiinnen aliýminiidiń miǵa áseri týraly teoriiany antivakserler belsendi túrde tarata bastaǵan. Alaida, bala kezinde poliomielitke, sirespege, tumaýǵa jáne difteriiaǵa qarsy vaktsina alǵan adamdardyń Altsgeimer aýrýyna shaldyǵý qaýpi tómen dep boljaýǵa múmkindik beretin zertteýler de bar eken.
«Shyn máninde, vaktsinalardaǵy tuzdar nemese aliýminii oksidteri densaýlyqqa aitarlyqtai áser ete almaidy, óitkeni olardyń mólsheri óte az.
Quramynda aliýminii bar adiývanttar sýda erimeidi, qan tamyrlaryna enbeidi jáne búkil denege taralmaidy.
Osylaisha, aliýminii negizindegi adiývanttar denege ziian keltirip, aýtizm men Altsgeimer aýrýyn týdyrýy múmkin dep aitýǵa tolyq negiz joq. Bul teoriiany rastaityn ǵylymi dálelder de joq. Qaznet paidalanýshylary súiengen doktor Shoýdyń zertteýi dáieksiz dep tanyldy jáne avtordyń óziniń ótinishi boiynsha keri qaitarylyp alyndy, tiisinshe, aqparattyń senimdi derekkkózi bola almaidy», - dep qorytyndy jasady stopfake.kz.
