Vaktsina alýǵa qarsy bolyp, keiin oiyn ózgertkenderdiń biri astanalyq kópbalaly ana Ziýar Jumanova «Azattyq rýhy» aqparat agenttigine suhbat berdi, dep habarlaidy "Ult aqparat".
Kópbalaly ana Ziýar Jumanova osy ýaqytqa deiin vaktsina saldyrýǵa qarsylyq bildirgenderdiń biri. Óitkeni, qysta tumaýǵa qarsy ekpe alǵan kezinde aýrýyn asqyndyryp alǵan.
«Adam aýyrǵan kezde ekpe salǵanda onyń áseri qatty eken. Onyń ústine áleýmettik jelide túrli aqparattar bar. Sony oqyp, bilgennen soń adam batyly barmaidy eken. Kádimgidei oilanyp qalasyń, «vaktsina arqyly bizdi óltireiin dep jatyr ma» degen sekildi. Vaktsinaǵa qatysty túrli aqparattar jan-jaqtan kelip jatady. Onyń ishinde «adamdardyń dene múshesin satady» degen aqparatta bar, soǵan sendim. Biraz adam birigip jelide vaktsinaǵa qarsy chat ashtyq, maqsat – vaktsinaǵa qarsy shyǵý. Sebebi vaktsinanyń qaýiptiligine qatysty jalǵan aqparattar kóptep kelip tústi, qaisysyna senerińdi bilmeisiń. Sodan Báiterektiń qasynda vaktsinaǵa qarsy aktsiia uiymdastyrdym, biraq onda menen basqa eshkim bolmady», - dedi Jumanova.
Kópbalaly ananyń aitýynsha, vaktsina saldyrýǵa degen qarsylyǵyn eshkim qoldamaǵan.
«Úlken ulym áskerde, basynda vaktsina alýyna qarsy boldym. Degenmen ekpeni aldy jáne qazir bári durys ekenine kózim jetti. Kerisinshe ulymnyń densaýlyǵy jaqsara túsken sekildi kórindi. Búginde meniń qaiyn jurtymnyń bári birdei vaktsina aldy. Bastysy jaqyndarym din-aman, soǵan qýanamyn. Qazir vaktsina alýǵa qarsy emespin. Sebebi indettiń zardabyn shekkenderdiń zaryn óz kózimmen kórdim. Sodan keiin aiaǵymdy tarttym. Vaktsinaǵa qatysty kózqarasymdy ózgerttim, vaktsina alǵan jaqyn jaqyndarymnyń bári aman-esen», - deidi ol.
