QR Densaýlyq saqtaý ministrligi Sanitarlyq-epidemiologiialyq baqylaý komitetiniń tóraǵasy Aijan Esmaǵambetova nelikten maska taǵýdyń áli de mindetti ekenin túsindirdi, dep habarlaidy QazAqparat.
Aijan Esmaǵambetova «Tek «jasyl» mártebesi bar adamdar saýda, oiyn-saýyq ortalyqtaryna bara alsa, maskasyz júre ala ma?» degen suraqqa jaýap berdi.
«Joq, maska taǵý mindetti. Óitkeni qazir vaktsina alǵandardyń da aýrý juqtyratyny belgili boldy. Tiisinshe, ol da qaýipti bolýy múmkin. Degenmen vaktsina alǵandar ońailyqpen virýs juqtyrmaidy jáne aýrýdy da jeńil ótkeredi. Infektsiianyń taralýy az, biraq taralatyny rastaldy. Sondyqtan búginde álemde eshkim maskadan bas tartqan joq. Shekteý men aldyn alý sharalary arasynda teńgerim bar», - dedi Aijan Esmaǵambetova Úkimet otyrysynan keiin tilshilerge bergen suhbatynda.
Sonymen birge jýrnalister qazaqstandyqtardyń qashan maskadan bas tartatynyn surady.
«Menińshe, naqty kúndi eshkim atai almaidy. Bul kóp faktorly áreketterdiń nátijesi bolady. Virýs áli de mýtatsiialanyp jatyr. Munda da árqaisysymyzdyń úlesimiz bar. Biz neǵurlym baiaý vaktsina alsaq, virýstyń taralýy soǵurlym jedeldeidi jáne mýtatsiia múmkindigi soǵurlym joǵary bolady. Al virýstyń mýtatsiiasyn búginde boljaý múmkin emes. DDU virýsty qaýipti mýtatsiialarǵa bóledi, olar jiti baqylaýda», - dedi komitet tóraǵasy.
Spiker «Memleket azamattardy 80% vaktsinalasa, maskany sheshýge bola ma?» degen suraqqa da jaýap berdi.
«Maskany qashan sheshetinimizdi aita almaimyn. Túsinemin, bárimiz maska taǵýdan sharshadyq, biraq ókinishke orai, bul koronavirýstan qorǵaý sharalarynyń biri», - deidi Aijan Esmaǵambetova.
