Elimizdegi joǵary oqý oryndarynyń vaktsina alǵan stýdentteri men oqytýshylary joldamalar jáne aqshalai syilyqtarǵa ie bolyp jatyr, dep habarlaidy "Ult aqparat" BǴM baspasóz qyzmetine silteme jasap.
Esterińizge sala keteiik, buǵan deiin QR Bilim jáne ǵylym ministri Ashat Aimaǵambetovtiń tapsyrmasy boiynsha ýniversitetter bilim alýshylar men qyzmetkerler arasynda vaktsinatsiiany yntalandyrý sharalaryn ázirlegen bolatyn.
S. Amanjolov atyndaǵy Shyǵys Qazaqstan ýniversitetinde vaktsinatsiianyń tolyq tsiklynan alǵashqylardyń biri bolyp ótken stýdentter Sibe kólderiniń demalys ornyna joldama aldy. Ýniversitet rektory Muhtar Tólegen atap ótkendei, stýdentter jappai vaktsinatsiialaý naýqanyna belsendi qatysyp jatyr.
«Sibe kólderiniń demalys ornyna joldamany belsendi 20 stýdent jeńip aldy. Olar aktsiia jariialanǵan sátten bastap vaktsinanyń eki komponentin saldyrǵan. Ýniversitette barlyq sanitarlyq-epidemiologiialyq talapty saqtai otyryp, oqý jylyn bastaýǵa daiyndyq jumystary qyzý júrip jatyr. Maýsymnan bastap «Ashyq» júiesi jumys isteidi. Barlyq aýditoriia, zerthana, sporttyq jáne basqa da oqý oryndarynda qajetti jumystar júrgizilip jatyr», – dep atap ótti Muhtar Tólegen.
«Vaktsinany alǵannan keiin biz óz densaýlyǵymyzdy qorǵap qana qoimai, sonymen birge jańa oqý jyly qarsańynda demaldyq. Ýniversitet basshylyǵyna stýdentterge kórsetken qamqorlyǵy úshin alǵys bildiremiz. Bul vaktsinatsiiany yntalandyrý boiynsha buryn-sońdy bolmaǵan qoldaý sharasy dep sanaimyn», – deidi S. Amanjolov atyndaǵy Shyǵys Qazaqstan ýniversitetiniń stýdenti Viktoriia Tkacheva.
Joǵary oqý ornynda stýdentter men oqytýshylardy yntalandyrý boiynsha birqatar basqa da sharalar qarastyrylǵan. 60-qa jýyq stýdent arnaiy jeńildikter men yntalandyrý syilyqtaryn aldy. Máselen, jataqhanada turýǵa jeńildikter, fitnes-ortalyǵyna jáne basseinge abonementter. Qazirgi ýaqytta S. Amanjolov atyndaǵy Shyǵys Qazaqstan ýniversitetinde stýdentterdiń 86%-dan astamy, al qyzmetkerlerdiń 98%-y ekpe alǵan.
Sh. Ýálihanov atyndaǵy Kókshetaý ýniversitetiniń stýdentteri men oqytýshylary arasynda da «Tulpar» saýyqtyrý keshenine joldamalar oinatyldy. Utys oiynynyń birinshi kezeńiniń qorytyndysy boiynsha 10 stýdent 25 myń teńgeden, al oqytýshylar men qyzmetkerler 50 myń teńgeden aldy. Ekinshi týr qyrkúiektiń birinshi onkúndigine josparlanyp otyr.
M. Áýezov atyndaǵy Ońtústik Qazaqstan ýniversitetiniń stýdentteri men oqytýshylary da qundy syilyqtar men joldamalarǵa ie boldy. Jańa oqý jyly qarsańynda 10 stýdent bir kúndik avtotýrǵa jáne kieli jerlerge saiahatqa barady, al 5 stýdent TOEFL emtihanyn tegin tapsyrýǵa múmkindik alady. 1 shilde – 1 tamyz aralyǵynda vaktsina alǵan ýniversitettiń professorlyq-oqytýshylyq quramyna Saryaǵash shipajaiyna joldamalar beriledi. Olar úshin sondai-aq aqshalai syilyqtar da qarastyrylǵan.
Qazaq ulttyq qyzdar pedagogikalyq ýniversitetinde professor-oqytýshylar quramy men qyzmetkerlerdiń 90%-ǵa jýyǵy, sondai-aq 18 jastan asqan myńnan astam stýdent ekpe saldyrdy. Vaktsina alǵan bilim alýshylardyń arasynda til kýrstaryna sertifikattar oinatyldy.
