Májilistiń jalpy otyrysynda «Qazaqstan Respýblikasynyń Ákimshilik quqyq buzýshylyq týraly kodeksine janýarlarǵa jaýapkershilikpen qaraý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
«Qazirgi ýaqytta Ákimshilik quqyq buzýshylyq týraly kodekstiń 408-babynda qańǵybas itter men mysyqtardy ustaý, serýendetý, aýlaý jáne joiý erejelerin buzǵany úshin 3-ten 10 ailyq eseptik kórsetkishke deiin aiyppul qarastyrylǵan. Sonymen birge, bul bapta qańǵybas janýarlardy aýlaý, janýarlardy esepke alý jáne óltirý kezindegi mundai zań buzýshylyqtar qamtylmaǵan jáne qoryta kelgende, janýarlarǵa qatygezdik jasaǵany úshin jeke bap bolǵan joq. Osyǵan bailanysty, Ákimshilik quqyq buzýshylyq týraly kodekske ózgerister engizý týraly ilespe zań jobasy janýarlarǵa qatygezdikpen qaraý ári úidegi jáne qańǵybas itter men mysyqtardy aýlaý, ustaý, esepke alý, serýendetý, tasymaldaý, jansyzdandyrý qaǵidalaryn buzýǵa arnalǵan jekelegen baptardy bólý bóliginde pysyqtaldy», - dedi Ekologiia, geologiia jáne tabiǵi resýrstar ministri Serikqali Brekeshev.
Onyń aitýynsha, Ákimshilik quqyq buzýshylyq týraly kodekske ózgerister engizý týraly zań jobasynyń 407-1 baptarynda janýarlarǵa qatygezdikpen qaraǵany úshin jeke tulǵalarǵa 5-ten 20 ailyq eseptik kórsetkishke deiin, laýazymdy tulǵalarǵa 10-nan 40 ailyq eseptik kórsetkishke deiin aiyppul kózdelgen.
«407-2-baptyń usynylǵan redaktsiiasynda úi jáne qańǵybas itter men mysyqtardy aýlaý, ustaý, esepke alý, serýendetý, tasymaldaý, jansyzdandyrý erejelerin buzǵany úshin jeke tulǵalarǵa 10-nan 20 ailyq eseptik kórsetkishke deiin, laýazymdy tulǵalarǵa 20-dan 30 ailyq eseptik kórsetkishke deiin, zańdy tulǵalarǵa 30-dan 40 ailyq eseptik kórsetkishke deiin aiyppul qarastyrylǵan. Zań jobasyn ázirleý kezinde aiyppul mólsherin anyqtaý boiynsha halyqaralyq tájiribe eskerildi. Máselen, Germaniiada janýarlardy serýendetý tártibin buzǵany úshin aiyppul 68 eýrony quraidy, bul 33 myń teńge. Resei Federatsiiasynda 15 myń teńgege teń aiyppul qarastyrylǵan», - dedi ministr.
