ShQO-da úshtildilik oqý baǵdarlamasyn júzege asyrý maqsatynda deńgeilep oqytý ádisi júrgiziletin bolady. Búgingi tańda mektep muǵalimderi tildik pánderden oqytý ádistemesi boiynsha biliktiligin arttyrý kýrstarynan ótýde.
Shyǵys Qazaqstan Aimaqtyq kommýnikatsiialar qyzmetinde ótken baspasóz máslihatynda ShQO Bilim basqarmasynyń basshysy Aijan Sadyqova málim etkendei, qazirdiń ózinde orystildi mektepterde qazaq, al qazaqtildi mektepterde orys tilin oqytý úshin jańa oqytý júiesi qurylǵan.
– Atalǵan baǵdarlamany iske asyrý úshin negizgi eki máseleni meńgerý qajet boldy. Birinshi kezekte barlyq oqytý mekemelerinde birdei oqýlyqtardyń bolýyn qamtamasyz etýdi kózdep otyrmyz jáne ekinshiden muǵalimderdiń kásibi biliktiligin arttyrý negizge alynyp otyr. Mysaly, birneshe jyl boiy mektepte aǵylshyn tili oqytylǵanymen, kópshilik oqýshylar birden aǵylshynda sóilep kete almaidy. Sebebi ár mektep ár tildi oqytý úshin ártúrli avtorlardyń oqýlyqtaryn qoldanady, – dedi Aijan Sadyqova.
Basqarma basshysy aityp ótkendei, atalǵan máseleni sheshý úshin barlyq mektepterde birdei oqýlyq qoldanyp, birdei ádistemelik júie qalyptastyrý qolǵa alynǵan. Aǵylshyn deńgeilep oqytý júiesi boiynsha halyqaralyq deńgeidegi barlyq qajetti quraldar bolǵanymen, qazaq jáne orys tilderin deńgeilep oqytý ádisi buǵan deiin bolmaǵan.
– Qazaq tilin oqytý úshin Faýziia Shamsiqyzy Orazbaevanyń ázirlegen oqýlyǵyn zertteý barysynda ol Qazaqstandaǵy qazaq tilin deńgeilep oqytýshy birinshi oqýlyq ekendigin ańǵardyq. Keiin tájiribelik oqý quralyn Bilim jáne ǵylym ministrligi bekitkennen keiin, oblystaǵy 324 orystildi mektepterdiń barlyǵyna osy oqýlyq satyp alyndy, – dedi basqarma basshysy Aijan Sadyqova.
Orys tiline kelgende másele kúrdelene túsken. Anyq bolǵandai orys tilin qazaq mektepterinde deńgeilep oqytý ádisi Qazaqstana da, Reseide de kezdespegen. Biraq, Máskeýde Elizaveta Hamraeva atalǵan ádis boiynsha oqýlyqtardy jańadan shyǵara bastaǵan. Keiin oblystan 8 praktik ustazdar Máskeýge attanyp, bar oqýlyqtardyń negizinde ádistemeni jasaǵan.
Qazirdiń ózinde ustazdarǵa oqýlyqtar men ádistemeler taratylyp, oqytý jumystary bastalǵan. Endi bir jyl kóleminde til ustazdary ádistemeni meńgergennen keiin, ózge pánniń ustazdary da tilderdi meńgerýge kirispek.
