Indýstriia jáne infraqurylymdyq damý ministri Qaiyrbek Óskenbaev sońǵy ýaqytta jolaýshylardyń narazylyǵyn týdyrǵan reisterdiń keshigýi máselesi týraly pikir bildirdi, - dep habarlaidy "Ult aqparat".
"Sońǵy kezderi el ishindegi, sondai-aq halyqaralyq baǵyttar boiynsha ushatyn reisterge qatysty hat-habarlamalar kóptep túsip jatyr. Shynymen, búgingi tańda áýe kóligindegi jolaýshylar aǵynynyń kúrt ósýi baiqalady. Bul óz kezeginde reisterdiń keshigýine ákep soǵyp, otandastarymyzdyń narazylyǵyn týdyryp otyr.
Oryn alǵan bul máseleni jedel sheshý maqsatynda qazaqstandyq áýe tasymaldaýshylarǵa jańa ushaqtar satyp alýdy tapsyrdym. Osylaisha, jyldyń sońyna deiin jalpy syiymdylyǵy 2,5 myń oryndy quraityn 14 jańa áýe kemesi paidalanýǵa beriletin bolady. Atap aitqanda, «SCAT» aviakompaniiasy 9 ushaq, «Fly Arystan» – 3 jáne «Air Astana» 2 ushaqpen tolyqtyrylady. Bul sharalar tasymaldaý syiymdylyǵyn edáýir arttyra túspek" - dep jazdy ministr Telegram-daǵy paraqshasynda.
Onyń aitýynsha, áýe tasymaldaryna qatysty suranys jyldan jylǵa artyp keledi. Sondyqtan suranysty qanaǵattandyryp, reisterdiń keshigýin aldyn alý úshin qazaqstandyq áýe kemeleri parki 2025 jylǵa deiin 51 birlikke ulǵaiady.
"Jalpy reisterdiń keshigý faktileri boiynsha túsip jatqan shaǵymdardy eskere kele, meniń tapsyrmam boiynsha QR IIDM Azamattyq aviatsiia komiteti men Qazaqstannyń aviatsiialyq ákimshiligindegi áriptesterim tiisti tergeý amaldaryn bastap ketti. Eger jolaýshylardyń quqyqtaryn buzý faktileri anyqtalsa, tiisti aviakompaniialar ákimshilik jaýapkershilikke tartylatyn bolady" - dedi Qaiyrbek Óskenbaev.
