Kóliktegi bas memlekettik sanitar dáriger Sádýaqas Baiǵabylov Nur-Sultan men Almaty arasynda ishki áýe reisteri qaita jandanǵannan keiingi negizgi sanitarlyq-epidemiologiialyq talaptardy túsindirdi, dep habarlaidy "Ult aqparat".
Kóliktegi bas memlekettik sanitar dáriger ishki áýe reisterinde sanitarlyq karantindik baqylaýdy kúsheitý týraly tiisti qaýly qabyldady.
«Nur-Sultan men Almaty qalalary arasynda mynadai negizgi talaptar anyqtalǵan: Jolaýshylarda COVID-19 juqtyrmaǵany týraly anyqtama bolýy tiis. Inkýbatsiialyq kezeńniń ortasha mánin eskergende anyqtamanyń jaramdylyq merzimi ol berilgen kúnnen bastap 7 kúntizbelik datany quraidy. Jolaýshylar áýejai ǵimaratyna, ushý alańyna jáne áýe kemesiniń bortyna tek maskamen ǵana jiberiledi. Sonymen qatar áýe kemesine tirkelý, otyrý jáne túsý kezinde jolaýshylar arasynda qaýipsiz araqashyqtyq (1 metr) saqtalýyn qamtamasyz etý qajet. Buǵan qosa, ushaq bortynda qaýipsiz araqashyqtyqty saqtaý úshin qatardaǵy bir oryndyq bos qaldyrylyp, jolaýshylar otyrǵyzylady», - deidi ol.
Onyń atap ótýinshe, sala mamandary ushý aýmaǵynda jáne ushaq bortyna otyrǵyzý kezinde barlyq jolaýshylardyń jáne ekipaj músheleriniń dene qyzýyn ólsheidi. Munan bólek, ushaq bortynda, áýejai terminalynda zalalsyzdandyrý rejimin saqtaý boiynsha qatań talaptar aiqyndalǵan.
«Aita keterligi, monitoring barysynda munan ary jolaýshylarda COVID-19 aýrýy tirkelmegen jaǵdaida talaptardy jeńildetý máselesi qarastyrylady. Sonymen qatar sanitarlyq-epidemiologiialyq ahýaldy eskere otyryp, Qazaqstannyń ózge qalalaryna, onyń ishinde halyqtaralyq áýe reisterin qaita jandandyrý múmkindikterin kezeń-kezeńimen qarastyryp jatyrmyz», - dedi Sádýaqas Baiǵabylov.
