Advokat Johar Ótebekov Almatydaǵy Ál-Farabi dańǵylynda úsh adamnyń ómirin qiǵan jol apatyna qatysty is boiynsha zańnamanyń qalai qoldanylýy múmkin ekenin túsindirdi, dep habarlaidy ult.kz.
Onyń aitýynsha, adam ólimine ákelgen jol-kólik oqiǵalary boiynsha taraptardyń tatýlasýy kúdiktini nemese sottalýshyny qylmystyq jaýapkershilikten bosatpaidy. Sonymen qatar zańda shartty jaza taǵaiyndaýǵa tikelei tyiym salynbaǵanymen, sot tájiribesinde mundai ister boiynsha ol sirek qoldanylady.
Advokattyń sózinshe, atalǵan bap boiynsha jeti jyldan on jylǵa deiin bas bostandyǵynan aiyrý jazasy qarastyrylǵan. Alaida aiyptalýshy kinásin moiyndap, keltirilgen shyǵyndy ótese jáne aýyrlatatyn mán-jailar bolmasa, sottar kóbine bes jyl shamasyndaǵy jaza taǵaiyndaidy.
Ótebekov sondai-aq tergeý izoliatorynda ótkizilgen ýaqyttyń jaza merzimine esepteletinin atap ótti. Qoldanystaǵy tártip boiynsha bir kún tergeý izoliatorynda otyrý túzetý koloniiasyndaǵy eki kúnge teńestiriledi.
Onyń túsindirýinshe, sottalǵan adam jaza merziminiń tórtten bir bóligin ótegennen keiin qalǵan jazany neǵurlym jeńil jaza túrine aýystyrýdy surai alady. Sondyqtan bes jyldyq jaza taǵaiyndalǵan jaǵdaida belgili bir quqyqtyq tetikter arqyly shamamen bir jyl úsh aidan keiin bostandyqqa shyǵý múmkindigi týyndaýy yqtimal.
Eske salaiyq, 21 naýryz kúni Almatydaǵy Ál-Farabi dańǵyly men Meńdiqulov kóshesiniń qiylysynda aýyr jol apaty bolyp, úsh adam qaza tapqan edi. Aldyn ala málimet boiynsha, Zeekr kóliginiń júrgizýshisi qarsy jolaqqa shyǵyp ketip, Mercedes avtokóligimen soqtyǵysqan. Saldarynan Mercedes júrgizýshisi men eki jolaýshy oqiǵa ornynda kóz jumdy.
Keiin bul oqiǵa qoǵamda úlken rezonans týdyryp, apatqa politsiianyń joǵary laýazymdy qyzmetkeriniń qatysy bolýy múmkin degen boljamdar aityldy. Alaida quqyq qorǵaý organdary bul aqparatty resmi túrde rastaǵan joq.
Oqiǵadan keiin Ishki ister ministrliginiń sheshimimen Almaty politsiia departamentiniń jol qaýipsizdigine jaýapty birneshe basshysy qyzmetinen bosatyldy.
