Tártipsizdik kezinde urlanǵan qarýdy óz erikterimen tapsyrǵan adamdarǵa qylmystyq jaýaptylyqtan bosatylady.
Bul týraly búgin Ortalyq kommýnikatsiialar qyzmetinde QR Bas prokýratýrasy birinshi qyzmet basshysynyń orynbasary Eldos Qilymjanov málim etti, dep habarlaidy QazAqparat.
«Quqyq qorǵaý organdary qylmystyq isterdi tergeýmen qatar, urlanǵan qarýdy izdeý jáne olardy tárkileý jumystaryn jalǵastyrýda. Ishki ister ministrliginiń ókili aitqandai, qarýlardy óz erkimen tapsyrý múmkindigi bar. Óz kezeginde Bas prokýratýra zańsyz saqtalǵan qarýlardy, oq-dárilerdi, jarylǵysh zattardy óz erikterimen tapsyrǵan adamdarǵa qylmystyq jaýaptylyqtan bosatý kepilin beredi», - dedi Eldos Qilymjanov.
Onyń aitýynsha, qarýdy óz erkimen tapsyrǵandardyń áreketterinde basqa da qylmys quramy bolmaýy kerek.
«Sonymen qatar azamattardyń nazaryna aita ketetin jáit, adam qarýmen júrip, quqyq qorǵaý organdaryna ustalsa, ondai jaǵdai óz erkimen qarýdy tapsyrý dep tanylmaidy. Ishki ister organdaryna zańsyz ainalymnan atys qarýlaryn alý boiynsha jedel-izdestirý jáne profilaktikalyq is-sharalardy jandandyrý týraly tapsyrma berildi», - dedi Bas prokýratýranyń ókili.
