Qazaqstan Musylmandary dini basqarmasynyń tóraǵasy, Bas múfti Naýryzbai qajy Taǵanuly Qurban ait qarsańynda halyqqa úndeý jasady, dep habarlaidy QazAqparat.
«Búgin kúnderdiń Sultany – qasitetti Jumada, ailardyń ulyǵy – Zulhidja aiynda halqymyzdyń amandyǵy men elimizdiń igiligi úshin jasap jatqan duǵa-tilekterińiz qabyl bolǵai! Ardaqty Paiǵambarymyz Muhammed (oǵan Allanyń salaýaty men sálemi bolsyn) «Alla Taǵalanyń quzyrynda osy kúnde jasalǵan izgi amaldan abzal ári súikimdi igi is joq» degen. Osy kúnderi Oraza ustap, sadaqa berip, naýqastarǵa dári jetkizip, qaraýsyz qalǵan qarttar men jetimderge, kópbalaly otbasylarǵa kómektesýdiń saýaby mol. Shalǵan qurbandyq, bergen sadaqa, jasaǵan árbir igi amaldardyń saýabyn Alla Taǵala barshamyzǵa násip etkei», - dedi Bas múfti Ortalyq kommýnikatsiialar qyzmetinde.
Bas múfti qasitetti kúnder men ailarda adam balasynyń riiasyz jasaǵan qulshylyǵy men duǵasy qabyl bolatynyn jetkizdi.
«Allanyń Ás-Salam – iaǵni amandyq pen Ásh-Shafi – shipa berýshi kórkem esimderin ulyqtai otyryp, dertke shaldyqqandardyń dertine shipa suraimyz. Qaitys bolǵandar úshin Alladan rahym, paiǵambardan shapaǵat suraimyz. Biz – ótkenge salaýat aityp, Allanyń arailap atqan árbir tańynan jaqsylyq kútken halyqpyz. Rýhymyzdy túsirmei, syn saǵatynda saǵymyzdy syndyryp almaiyq. Qadirli jamaǵat! Biz qazir syndarly sátte otyrmyz. Mundaida halyq danalyǵy «Betege ketse bel qalar, bekter ketse el qalar, berekeń ketse ne qalar?» demei me? Ardaqty Paiǵambarymyz aitqandai, jaqsy sóilep, ainaladaǵy adamdarǵa shýaq shashyp, úreige emes úmitke qanat bitireiik. Aldymyzda kúlli isi musylman balasy asyǵa kútken ulyq meiram – Qurban Ait kele jatyr. Ait qarsańynda barshańyzǵa Allanyń amandyǵy men jaqsylyǵyn tileimin», - dedi Naýryzbai qajy Taǵanuly.
