Ulytaý oblysynda júrgizýshi kýáligin zańsyz rásimdep beremin dep azamattardy aldaǵan kúdikti ustaldy, dep habarlaidy ult.kz.
Polisia.kz málimetinshe, oblystyq politsiia departamentiniń kiberqylmysqa qarsy is-qimyl basqarmasynyń qyzmetkerleri alaiaqtyq jasady degen kúdikpen Sátbaev qalasynyń turǵynyn qolǵa túsirgen.
Tergeý nusqasyna sáikes, kúdikti internet pen áleýmettik jeliler arqyly júrgizýshi kýáligin emtihansyz jáne qysqa merzimde alyp berýge kómektesetinin aityp, azamattarǵa óz qyzmetin usynǵan. Alaida aqsha alǵannan keiin klientterimen bailanysyn úzgen.
Qazirgi ýaqytta bul is boiynsha 20-ǵa jýyq jábirlenýshi anyqtaldy. Atalǵan derek boiynsha sotqa deiingi tergep-tekserý amaldary júrgizilip jatyr.
Politsiia júrgizýshi kýáligin alý tek zańda belgilengen tártippen júzege asyrylatynyn eske saldy. Ol úshin arnaiy oqý kýrsynan ótip, emtihandardy tapsyryp, qujattardy halyqqa qyzmet kórsetý ortalyǵy arqyly rásimdeý qajet.
Quqyq qorǵaý organdary oqýsyz jáne emtihansyz júrgizýshi kýáligin rásimdeýdi usynatyn kúmándi usynystarǵa senbeýge shaqyryp, osyndai jaǵdailarǵa tap bolǵan azamattarǵa birden politsiiaǵa habarlasýǵa keńes berdi.
