© Photo : pixabay/soumen82hazra
Ulytaý oblysyndaǵy qystaqtardyń birinde 46 jastaǵy er adam óli tabyldy. Politseiler marqumnyń kim ekenin anyqtap, kúdiktini ustady, - dep habarlaidy Tengrinews.kz portaly.
Marqum qystaýdyń iesi, sharýa qojalyǵynyń basshysy bolyp shyqty. Máiittiń tabylǵany týraly habarlama Ulytaý aýdandyq politsiia bólimine 31 qańtarda keshke kelip túsken. Kýágerlerdiń aitýynsha, marqumnyń denesinen birneshe pyshaq jaraqatynyń izi tabylǵan.
Máiit tabylǵan qystaý Ulytaý aýylynan 12 shaqyrym jerde ornalasqan. Oqiǵa ornyna dereý oblystyq Politsiia departamenti men Ulytaý aýdandyq politsiia bóliminiń qyzmetkerlerinen quralǵan jedel-tergeý toby jiberilgen. Olar qysqa merzimde oqiǵanyń hronologiiasyn anyqtap, kisi óltirgen kúdiktini ustady.
"Jedel-izdestirý is-sharalary barysynda kriminaldyq politsiia qyzmetkerleri jedel izdestirý sharalaryn júrgizip, osy sharýa qojalyǵynyń 45 jastaǵy jumysshysyn anyqtap, ustady. Kúdikti kinásin moiyndady. Ol qylmysty janjal kezinde jasaǵanyn túsindirdi. Osydan keiin ol atqa minip tyǵylmaq bolǵan, biraq aýmaqty qaraý kezinde ustalǵan. Zattai aiǵaq alyndy, tiisti saraptamalar taǵaiyndaldy", - dedi Ulytaý oblystyq PD baspasóz qyzmeti ókilderi.
Sotaldy tergeý Qylmystyq kodekstiń 99-baby "Adam óltirý" boiynsha júrgizilip jatyr. Kúdikti ýaqytsha ustaý izoliatoryna qamalǵan.
