Atyraý oblysynyń Qurmanǵazy aýdanynda turatyn jas ustaz Uldana Naýryzǵalieva Britandyq keńes uiymdastyrǵan bastaýysh jáne orta synyp oqýshylaryna arnalǵan «Aǵylshyn tilinen úzdik video sabaq» onlain baiqaýyna qatysyp, úzdik 30 muǵalimniń qataryna endi, dep habarlaidy QazAqparat.
Uldan Naýryzǵalieva Abylai han atyndaǵy qazaq halyqaralyq qatynastar jáne álem tilderi ýniversitetin bitirgen. Eńbek jolyn úsh jyl buryn bastaǵan. Qazir Qurmanǵazy aýdanynda ornalasqan Abai atyndaǵy orta mektepte aǵylshyn tili páninen dáris beredi. Ol Ulybritaniiadaǵy Ýorik ýniversitetiniń qoldanbaly lingvistika ortalyǵynyń direktory Penni Mosaviannyń kirispe vebinarlaryna qatysqan.
«Bul vebinarlar muǵalimderge video sabaq jasaýdyń túrli qaǵidasyn, ádisteri men quraldaryn meńgerýge kómektesedi. Odan keiin mektep oqýshylary úshin aǵylshyn tiliniń leksikasy nemese grammatikasy týraly video sabaq ázirleý boiynsha tapsyrmalar berildi. Men jalpy bilim beretin mekteptiń 11-synybyna arnalǵan grammatikalyq «Question tags» taqyrybyn tańdadym» -deidi Uldana Naýryzǵalieva.
Onyń aitýynsha, bul baiqaý Britandyq keńestiń onlain-resýrstaryn paidalanyp, beine sabaq toptamasyn jasaýǵa, oqýshylardy qashyqtan oqytýda qoldaýǵa negizdelgen. Ár vebinardyń ýaqytyn, uiymdastyrylýyn Britandyq keńestiń joba menedjeri Ardaq Bekturova qamtamasyz etken. Muǵalimderge arnalǵan innovatsiialyq jobada jeke jáne praktikalyq jumystarda videony jaqsartý úshin keńester berilgen. Keiin jobany júzege asyrýshylar usynǵan taqyryp aiasynda qaitadan beine sabaq túsirip, baǵalaýǵa jiberedi eken.
Britandyq keńestiń onlain-baiqaýyna qazaqstandyq 200 ustaz qatysqan. Al atyraýlyq jas ustaz Uldana Naýryzǵalieva solardyń arasynan úzdik dep tanylǵan 30 muǵalimniń qataryna enip otyr.
