Ulybritaniia tálipter bilikke kelgen eki aptada 15 myńǵa jýyq britan jáne aýǵan azamatyn elden alyp shyǵyp, azamattyq evakýatsiia operatsiiasyn aiaqtaǵanyn málimdedi.
Ulybritaniianyń sońǵy azamattyq evakýatsiia ushaǵy Kabýl áýejaiynan 28 tamyz kúni ushyp ketti. Aldaǵy aptada Ulybritaniia Aýǵanstandaǵy óz áskerin alyp ketedi. Sol kezde aýǵan azamattarynyń shaǵyn tobyn alyp shyǵady dedi Ulybritaniia qorǵanys ministrliginiń baspasóz hatshysy.
27 tamyz kúni eldiń qorǵanys ministri Ben Ýolles Ulybritaniia dipókildigine qyzmet etken 800-1100 aýǵan evakýatsiia operatsiiasyna ilinbei qaldy dedi.
"Bárin alyp shyǵa almadyq jáne bul óte júrek aýyrtar jaǵdai. Biraq biz birqatar aýyr sheshim qabyldaýǵa májbúr boldyq" dedi Ulybritaniia áskeriniń generaly Nik Karter.
Ulybritaniianyń Aýǵanstandaǵy elshisi Lori Bristoý Aýǵanstanda qalyp qoiǵandarǵa video úndeý joldap, áýe evakýatsiiasynyń aiaqtalǵanyn málimdedi.
"Elden ketýge muqtaj adamdardy umytqan joqpyz" dedi Bristoý Kabýl áýejaiynan. "Olarǵa qoldan keler kómektiń bárin beremiz. Biz Aýǵanstannyń batyl, ádepti adamdaryn umytqan joqpyz. Olar beibitshilik pen qaýipsizdik jaǵdaiynda ómir súrýge laiyq".
Turkish Airlines áýe kompaniiasy Ulybritaniianyń sońǵy azamattyq evakýatsiia ushaǵynda aýǵan áieliniń bosanǵanyn habarlady. Turkish Airlines ushaǵy áýege kóterilgende 26 jastaǵy áieldiń tolǵaǵy kelip, ushaq Kýveit áýe keńistigine kirgende álgi áiel bosanyp úlgerdi.
Turkish Airlines bort qyzmetkerleriniń bosanýǵa kómekteskenin, sábidiń saý týǵanyn, anasynyń aman ekenin málimdedi.
Ushaq Kýveitke aialdap, odan ári Birmingemge ushyp ketti.
15 tamyzda tálipter Kabýlǵa kirip, Aýǵanstan biligin óz qolyna alǵanyn málimdegen soń, AQSh bastaǵan halyqaralyq koalitsiia óz azamattary men elshilikterine qyzmet etken aýǵan azamattaryn evakýatsiialaýǵa kóshti. Munyń aldynda AQSh prezidenti Djo Baiden amerikalyq áskerdi 31 tamyzǵa deiin alyp ketetinin málimdegen. Evakýatsiia operatsiiasyn syrttai baqylap otyrǵan tálipter bul merzimdi uzartýǵa qarsy ekenin, ondai jaǵdaida saldary bolatynyn aityp otyr.
