Búgin «Ádiletti jáne Progressivti Qazaqstannyń Halyqtyq Konstitýtsiiasy úshin!» jalpyulttyq koalitsiiasy músheleri Abai oblysynyń jurtshylyǵymen kezdesti.
Kezdesý barysynda Memlekettik keńesshi Erlan Karin Prezidenttiń Egemendik jáne Táýelsizdik sózderin nelikten bas árippen jazatynyna toqtalyp ótti.
«Memleket basshysy Qasym-Jomart Kemeluly túrli qujattarmen jumys istegende, óziniń sóileitin sózderinde Egemendik jáne Táýelsizdik uǵymdaryn árdaiym bas árippen jazady. Óitkeni, Prezident qoǵamdyq sanada bul sózderdiń erekshe qundylyq retinde ornyqqanyn qalaidy. Ata Zańnyń jańa mátininde de osy ustanym saqtaldy. Nege?! Sebebi, bular qoǵamdyq sanada qasietti jáne qasterli uǵymdar bolyp bekitilý úshin. Ásirese, jastardyń sanasynda. Bul maǵynasy jaǵynan mańyzdy áreket», – dedi Erlan Qarin.
Memlekettik keńesshiniń aitýynsha, jańa Konstitýtsiiada bul terminderdiń jii qoldanylýy onyń memlekettilikti kúsheitýdegi rólin aiqyndaidy. Atap aitqanda, 1995 jyly qabyldanǵan Ata Zańda «Egemendik» sózi 3 jerde kezdesedi. Al jańa Konstitýtsiiada 6 jerde qoldanylǵan. Sol sekildi «Táýelsizdik» sózi eski Ata Zańda nebary 1 ret atalsa, jańa Konstitýtsiiada 4 jerde qoldanylǵan.
Sondai-aq, Erlan Karin bul uǵymdardyń memlekettik basqarý júiesindegi quqyqtyq orny men olardy qorǵaý tetikterine basa nazar aýdardy. Onyń sózinshe, Egemendik pen Táýelsizdik Jańa Konstitýtsiiada memleket qyzmetiniń eń birinshi negiz quraýshy qaǵidaty retinde bekitildi.
«Jańa Ata Zańnyń «Konstitýtsiialyq qurylys negizderi» dep atalatyn I-bóliminiń 3-babynda Qazaqstan Respýblikasy qyzmetiniń negiz quraýshy qaǵidaty – «Egemendik pen Táýelsizdikti qorǵaý» dep anyq jazylǵan. Iaǵni, Egemendik pen Táýelsizdikti damytý nemese nyǵaitý dep emes, qorǵaý dep aiqyn kórsetilgen. Bul uǵymdy da Jańa Konstitýtsiiaǵa Memleket basshysynyń ózi engizdi», – dep naqtylady ol.
Sóz sońynda Memlekettik keńesshi Táýelsizdik pen aýmaqtyq tutastyq máseleleriniń myzǵymastyǵyna jáne bul qundylyqtardyń eshqashan talqylanbaityn norma ekenine toqtaldy.
«Buǵan qosa, Jańa Konstitýtsiiadaǵy 2-baptyń 2-tarmaǵynda jazylǵandai, «Qazaqstan Respýblikasynyń Egemendigi onyń búkil aýmaǵyn qamtidy. Memleket óz aýmaǵynyń tutastyǵyn, qol suǵylmaýyn, bólinbeýin qamtamasyz etedi». Sonymen qatar, «Qazaqstan Respýblikasynyń Egemendigi, Táýelsizdigi, ýnitarlyǵy, aýmaqtyq tutastyǵy men basqarý úlgisi ózgermeidi». Bul týraly jańa Ata Zańnyń 2-babynyń 7-tarmaǵynda naqty jazylǵan. Iaǵni, Egemendik, Táýelsizdik, Aýmaqtyq tutastyq qoǵamda másele retinde eshqashan talqylanbaidy. Tipti, referendýmǵa da shyǵarylmaidy. Memleket basshysy 2021 jyly óz maqalasynda jazǵandai, «Táýelsizdik bárinen qymbat». Endi bul sóz bizdiń kúndelikti ómirde ustanatyn uranymyz jáne Ata Zańymyzdaǵy mańyzdy norma bolyp bekitildi», – dep túiindedi Erlan Qarin.
