Ulttyq dombyra kúnine orai elimizdiń barlyq óńirinde mádeni baǵdarlama uiymdastyrylyp jatyr. Onyń aiasynda kontsertter, festivalder, kúishi jáne dombyrashylar baiqaýlary, kórmeler, ǵylymi konferentsiialar, mýzeiler men kitaphanalardaǵy arnaiy jobalar, shyǵarmashylyq kezdesýler men tanymdyq is-sharalar bar, dep habarlaidy ult.kz.
Elimiz boiynsha 2000-nan astam is-shara ótkizý josparlanǵan. Onyń ishinde 20-y respýblikalyq, 98-i oblystyq deńgeide uiymdastyrylady. Qalǵan is-sharalar aýdan ortalyqtary men aýyldyq eldi mekenderde, sondai-aq jergilikti mádeniet uiymdarynda ótedi. Merekelik is-sharalarǵa 2 millionnan astam adam qatysady dep josparlanyp otyr.
Ulttyq dombyra kúni jyl saiyn shilde aiynyń alǵashqy jeksenbisinde atalyp ótedi. 2018 jyly Memleket basshysynyń bastamasymen bekitilgen bul mereke ulttyq biregeilikti nyǵaitýǵa, jastardyń dástúrli ónerge qyzyǵýshylyǵyn arttyrýǵa jáne urpaqtar sabaqtastyǵyn saqtaýǵa baǵyttalǵan.
Biylǵy mereke jańa Konstitýtsiia kúshine engennen keiingi kezeńmen tuspa-tus kelip otyr. Jańarǵan Ata zań halyqtyń birligin bekemdep, ulttyq qundylyqtar men mádeni murany ulyqtaityn memlekettik damýdyń jańa kezeńine jol ashty.
Prezident Qasym-Jomart Toqaev dombyranyń ulttyq mádenietti saqtaýdaǵy mańyzyna toqtalǵan bolatyn. Memleket basshysy Ulttyq dombyra kúni qazaq halqynyń bolmysyn aishyqtap, jas urpaqtyń ulttyq rýhyn kóteretin mańyzdy mereke ekenin atap ótti.
Prezident óz sózinde: «Naǵyz qazaq – dombyra», – dep, qasietti dombyra Qazaqstannyń álemge tanylatyn biregei brendine ainalýǵa tiis ekenin aitty.
Merekelik is-sharalar Astana, Almaty, Shymkent qalalary men barlyq oblysta ótedi. Kásibi shyǵarmashylyq ujymdardyń, ulttyq aspaptar orkestrleriniń jáne jas oryndaýshylardyń qatysýymen kontsertter, festivalder men buqaralyq mádeni jobalar uiymdastyrylady.
5 shildede Astana qalasyndaǵy Amfiteatrda Ulttyq dombyra kúnine arnalǵan merekelik kontsert ótedi. Almatyda merekelik baǵdarlamalar birneshe ashyq alańda ótkiziledi. Qurmanǵazy atyndaǵy Qazaq ulttyq halyq aspaptar orkestri Arbatta, «Alataý» dástúrli óner teatrynda jáne Ortalyq saiabaqta óner kórsetedi. Al Qazaqstan Respýblikasynyń «Saltanat» memlekettik bi ansambli «Kúmbirle, dombyra, Jasai ber, Astana» atty kontserttik baǵdarlamasyn usynady.
Shymkent qalasynda merekelik kontsert «Shym Siti» saiabaǵynda ótedi. Biylǵy merekeniń halyqaralyq baǵdarlamasy da aýqymdy. Ulttyq dombyra kúni Qytai astanasy Beijińde de atalyp ótedi. Lianma ózeniniń jaǵalaýynda Qazaqstannyń mádeni ortalyǵy uiymdastyratyn Dombra Party is-sharasynda sheteldik kórermenderge qazaqtyń dástúrli óneri tanystyrylady.
Respýblikalyq deńgeidegi negizgi is-sharalar qatarynda Túrkistan oblysynda ótetin «Kúi qudireti» kúishiler baiqaýy, Qyzylorda oblysyndaǵy III respýblikalyq «Syr tolqyny» kúishiler baiqaýy, Dina Nurpeiisovanyń 165 jyldyǵyna arnalǵan «Ásemqońyr» respýblikalyq dombyrashylar baiqaýy jáne Soltústik Qazaqstan oblysynda uiymdastyrylatyn V halyqaralyq «Quzyljar Music Fest» festivali bar.
4 shildede Qazaqstan Respýblikasy Mádeniet jáne aqparat ministrliginiń bastamasymen ótetin respýblikalyq #dombrakuni chellendji merekelik baǵdarlamanyń mazmunyn aishyqtai túsedi. Chellendjge qatysýshylar áleýmettik jelilerde uzaqtyǵy bir minýtqa deiingi dombyra úni, ulttyq óner men merekelik kóńil kúidi dáripteitin beinerolikterdi #dombrakuni heshtegimen jariialai alady.
