Prezident Qasym-Jomart Toqaev qazaqstandyqtardy Ulttyq dombyra kúnimen quttyqtap, dombyranyń ulttyq rýh pen mádeni murany saqtaýdaǵy airyqsha rólin atap ótti. Bul týraly Aqorda habarlady, dep habarlaidy ult.kz.
Memleket basshysy dombyrany ulttyq biregeiliktiń ajyramas bóligi ári halqymyzdyń rýhyn kóteretin baǵa jetpes mura dep atady. Onyń aitýynsha, qos ishekti qasietti aspap arqyly ata-babadan jetken tól qundylyqtar urpaqtan urpaqqa jalǵasyp, tarihi sabaqtastyq saqtalyp keledi.
Prezident dombyranyń qýanyshty sátterde de, syndarly kezeńderde de eldiń birligin nyǵaityp, halyqtyń rýhyn asqaqtatqanyn aitty. Sondai-aq onyń kúmbiri azamattardy jigerlendirip, eldiń rýhani qundylyqtarymen úndesetinin jetkizdi.
Qasym-Jomart Toqaev qazirgi jahandyq syn-qaterler men dástúrli qundylyqtardyń álsireý qaýpi jaǵdaiynda dombyra qazaq mádenietiniń myzǵymas tuǵyry bolyp qala beretinin erekshe atap ótti.
Sonymen qatar Memleket basshysy qazaq dombyrasynyń áýezdi únin halyqaralyq deńgeide keńinen tanytý – barshaǵa ortaq mindet ekenin aitty. Osy rette ol aqyn Qadyr Myrza Áliniń «Naǵyz qazaq – dombyra» degen qanatty sózin eske alyp, bul ustanym ulttyq ónerdi dáripteýde basty baǵdar bolýy tiis ekenin jetkizdi.
Prezident Dombyra kúni qarsańynda kúshine engen jańa Konstitýtsiiada tarihi-mádeni murany saqtaý men ulttyq mádenietti qoldaý alǵash ret negizgi qaǵidattardyń biri retinde bekitilgenine nazar aýdardy. Onyń aitýynsha, bul halyqtyń bolmysy men eldiń damý baǵytyna tolyq sáikes keledi.
Sondai-aq Qasym-Jomart Toqaev dombyrashylarǵa, ustazdarǵa jáne ulttyq ónerdi Qazaqstanda ári shetelde nasihattap júrgen barsha azamatqa alǵys bildirip, qazaqtyń án-kúii aldaǵy ýaqytta da eldi jańa jetistikterge jeteleitinine senim bildirdi.
Aita keteiik, Ulttyq dombyra kúnine orai elimizdiń barlyq óńirinde 2000-nan astam mádeni is-shara uiymdastyrylady.
