Forex Club kompaniialar tobynyń sarapshysy Aidar Qaliasqar ulttyq valiýta dollarǵa qatynasynda osy aptada 380 teńgege deiin álsireýi múmkin degen boljam aitty, - dep habarlaidy kaz.tengrinews.kz tilshisi.
Onyń aitýynsha, búginde investorlarǵa munai baǵasynyń aldaǵy ýaqytta túsýi aýyr tiip jatyr. "Maýsym aiyndaǵy maksimýmnyń tereńdigi 20 paiyzǵa kele jatyr. Bul naryqtyń shikizat boiynsha kúrdeli tendentsiiaǵa ushyrap jatqanyn bildiredi. 43 dollar mejege qol jetkende 40 dollar deńgeiine daiyndala berý qajet, bul teńge baǵamynyń taǵy da alty paiyzǵa álsireýine ákep soǵýy múmkin", - dep atap ótti sarapshy.
Onyń aitýynsha, amerikalyq statistikanyń áserin umytpaý kerek: eger eńbek naryǵy boiynsha málimetter qýatty bolyp shyqsa, dollar naryqtyń barlyq spektri boiynsha kúsheiedi. Osylaisha, apta sońynda dollar/teńge jubynyń 360 jáne ármen qarai 380 dollar kórsetkishine deiin túsýi yqtimal.
Al munai baǵasy jaily suraqqa jaýap bere otyryp, ol barreliniń quny 40 dollar shamasynda bolatynyn boljady. Al buǵan álem naryǵyndaǵy munai qorynyń shamadan asyp ketýi múmkin degen qorqynysh áser etip otyr eken. Onyń ústine AQSh-taǵy munai burǵylaýshylardyń ónimi artyp keledi.
Eske salaiyq, osyǵan deiin Iskerlik ákimshiliktendirýdiń doktory Erlan Ibragim Tengrinews.kz tilshisine bergen suhbatynda ulttyq valiýtanyń álsireýi saqtalatynyn aitqan edi. Onyń aitýynsha, tamyz aiynyń sońyna deiin dollar 350-360 teńge aralyǵynda saýdalanady. "Teńgeniń álsireýine mańyzdy faktorlar áser etip otyr. Mysaly, eldegi ekonomikalyq jaǵdai, munai baǵasynyń tómendeýi men bazalyq mólsherlemeniń tómendeýi", - dedi Erlan Ibragim. Al keiin Ulttyq bank ókilderi teńgeniń nelikten álsirep jatqanyn túsindirdi.
