Ulttyq testileý ortalyǵy sońǵy kezde qoǵamda daý týdyrǵan UBT tapsyrý kezinde erejelerdi buhýǵa qatysty qosymsha málimetterdi jariialady, dep habarlaidy "Ult aqparat" Bilim jáne ǵylym ministrliginiń baspasóz qyzmetine silteme jasap.
Baspasóz qyzmetiniń málimetinshe, buǵan deiin Ulttyq testileý ortalyǵy elordalyq eki joǵary oqý ornynyń tórt stýdenti UBT kezinde 4 talapkerdiń ornyna testileý tapsyrmaq bolǵany týraly habarlaǵan. Aita keteiik, ortalyq qyzmetkerleri bul árekettiń aldyn alyp, politsiiaǵa júgingen. Iaǵni, talapkerler testileýge jiberilmei, ortalyq qyzmetkerleri buzýshylyqtardy der kezinde anyqtady.
«Erejelerdi óreskel buzýǵa qatysy bar adamdar boiynsha barlyq derek istiń mán-jaiyn anyqtaý jáne odan ári zerdeleý úshin quqyq qorǵaý organdaryna jiberildi. Degenmen, Ulttyq testileý ortalyǵy tarapynan erejeni óreskel buzǵan testilenýshilerdiń ata-analary týraly aqparat anyqtalmady jáne talapkerlerdiń aty-jónderi jariialanǵan joq. Óitkeni oryn alǵan jaǵdai balalarǵa qatysty bolyp otyr», delingen habarlamada.
Ministrliktiń málimetinshe, biyl UBT tapsyrý ortalyqtarynda talapkerdi testileýge kirgizý kezinde úsh satyly júie engizilgen. Iaǵni, testilenýshi jeke kýáligin kórsetti, Face-ID júiesinen ótti jáne UBT barysynda árbir qatysýshynyń aldynda kamera ornatyldy. Bul sharalardyń barlyǵy buzýshylyqtardyń aldyn alýǵa jáne Ulttyq biryńǵai testileýdi tapsyrý rásiminiń ashyqtyǵyn qamtamasyz etýge baǵyttalǵan.
«Máselen, eger ótken jyly UBT tapsyrýǵa talpynǵan bógde tulǵalar boiynsha 7 fakti anyqtalsa, biyl baqylaýdy kúsheitýdiń arqasynda 18 jaǵdai tirkeldi. Bul týraly buǵan deiin Ulttyq testileý ortalyǵynyń ókilderi jurtshylyqqa habarlaǵan bolatyn.
Sonymen birge eki jyl buryn UBT ótkizý erejelerine ózgerister engizildi. Olardyń qatarynda, tyiym salynǵan zattardy alyp ótýge tyrysqany úshin talapkerdi testileýge jibermeý jáne beine jazbany zerdeleý barysynda erejelerdi buzý jaǵdaiy anyqtalǵan kezde testileý nátijelerin joiý», delingen habarlamada.
Vedomstvonyń málimdeýinshe, UBT-ny ótkizý erejesine ózgeris engizilýi UBT-ǵa tyiym salynǵan zattardy alyp ótý áreketteri men UBT ótkizý erejesin buzýdyń azaiýyna alyp keldi.
«Máselen, 2019 jyly testileýge kirgizý kezinde 128 myń tyiym salynǵan zat anyqtalsa, tek 24 talapkerdiń ǵana nátijesi joiylǵan. Al, 2020 jyly belgilengen erejelerge sáikes tyiym salynǵan zattardy alyp kirýge tyrysqany úshin ǵana 2 522 úmitkerdiń nátijesi joiyldy. Biyl tyiym salynǵan zattardy alyp kirýge tyrysqandar sany 756-ǵa deiin azaidy», delingen habarlamada.
Bul – erejeni buzǵan qatysýshylardy testileýge jibermeý týraly ótken jyly engizilgen normaǵa, sondai-aq árbir testilenýshiniń aldynda beine baqylaý kameralarynyń ornatylýyna bailanysty bolyp otyr.
Sonymen qatar biyl testileý kezinde erejelerdi buzǵany úshin 1 305 adam aýditoriiadan shyǵaryldy, olardyń nátijeleri joiyldy.
Budan basqa, UBT aiaqtalǵannan keiin de Ulttyq testileý ortalyǵynyń qyzmetkerleri barlyq talapkerdiń testileý tapsyrǵany boiynsha beine jazbalardy taldaidy. Birinshi kezekte, 100-den astam ball jinaǵan, sonymen birge naýryz aiynda synaq testileý men mamyr aiyndaǵy testileýdi tapsyrý kezinde nátijeleri aitarlyqtai erekshelenetin talapkerlerdiń beine jazbalary qaralady. Ári qarai basqa beine jazbalar boiynsha taldaý júrgiziledi.
Biyl beine jazbalardy taldaý barysynda 19 talapkerdiń nátijesi joiylǵan bolatyn. Sáikesinshe, ol talapkerler bilim grantyna úmittene almaidy.
Bul baǵyttaǵy jumys qazir de júrgizilip jatyr. Sondyqtan uqsas jaǵdailar anyqtalǵan kezde talapkerlerdiń nátijeleri joiylyp, taǵaiyndalǵan bilim granttarynan da aiyrylady.
Aita keteiik, Ulttyq testileý ortalyǵynyń qyzmetkerleri UBT ótkizý kezinde erejelerdi buzý faktileri týraly jurtshylyqty únemi habardar etip otyrady jáne jaǵdaidy anyqtaý úshin quqyq qorǵaý organdaryna aqparat beredi.
«Búgin UBT-dan ótý úshin túrli qýlyqtarǵa baratyn talapker erteń dáriger, muǵalim nemese qutqarýshy bola otyryp, óz jumysyn adal atqarmaýy múmkin. Osyǵan bailanysty talapkerler men olardyń ata-analaryn akademiialyq adaldyqqa shaqyramyz. UBT tapsyrý kezinde ashyqtyqty qamtamasyz etý boiynsha jumystar odan ári jalǵasatyn bolady. Álemdik tájiribe kórsetip otyrǵandai, basqa elderde tártip buzýshylarǵa qatysty odan da qatań sharalar qoldanylady», – dedi QR BǴM Ulttyq testileý ortalyǵy direktorynyń m.a. Naýjan Didarbekova.
Eske sala ketsek, áleýmettik jelide UBT tapsyrý kezinde zań buzǵan 19 talapkerdiń arasynda shoýmen Tursynbek Qabatovtyń qyzy Ádemi Amanǵali da bar degen aqparat taraǵan bolatyn. Tanymal ártis Instagram paraqshasynda osy shýǵa bailanysty málimdeme jasady. Onyń aldynda shoýmenniń qyzynyń ornyna UBT tapsyrmaq bolǵan qyz «Eýraziia ulttyq ýniversitetiniń stýdenti» dep habarlandy. Alaida atalmysh JOO-nyń baspasóz qyzmeti «Symbat Qanaidyń EUÝ stýdenti ekendigi» týraly aqparatty joqqa shyǵardy.
