7 qyrkúiek saǵat 9:00-degi jaǵdai boiynsha 453556 respondent onlain sanaqtan ótti, dep habarlaidy Ulttyq statistika biýrosynyń baspasóz qyzmeti.
Baspasóz qyzmeti keltirgen derekterge qaraǵanda, onlain sanaqtan ótkenderdiń ishinde 394933-i sanaq.gov.kz saitynda, 46492 Egov portalynda tirkelý arqyly jaýap berse, 12131 adam sanaqqa Aitu qosymshasy arqyly qatysty.
Alǵashqy alty kúnniń qorytyndysymen megapolister alda kele jatyr. 65736 astanalyq turǵyn sanaqtan ótkeni jaily habarlama alǵan. Onlain sanaqtan ótken taǵy 64537 adam Almatyda tirkelgen. Úzdik úshtikti Shymkent túiindedi. Munda 51386 adam sanaq saýaldaryna jaýap berdi.
Bul kórsetkish boiynsha ázirge sońǵy eki oryndy Túrkistan jáne Atyraý oblystary enshilep tur. Bul óńirlerde sáikesinshe 5713 jáne 4124 adam sanaqtan ótipti.
Erekshe atap ótetin jait, bir adam ózimen birge turatyn basqa da otbasy músheleri úshin toltyra alady. Iaǵni, sanaq.gov.kz saityna bir ret qana tirkelip bir otbasyn qamtý múmkindigi qarastyrylǵan. Sanaq paraqtaryn toltyrý bastalǵan sátte «Respondentti qosý» nusqasy usynylady. Birge turatyn týysyńyzdyń JSN-in engizgen soń júie onyń tolyq aty-jónin avtomatty túrde shyǵarady. Bul múmkindik arqyly sanaq paraqtaryn toltyrýǵa ketetin ýaqytty aitarlyqtai únemdeýge bolady. Sanaq saýaldaryna jaýap bergen soń habarlama onlain ótken barlyq otbasy múshelerine ortaq bolyp sanalady.
«Ulttyq statistika biýrosy azamattardyń belsendiligi úshin alǵys aita otyryp, sanaqty onlain ótýge shaqyrady. sanaq.gov.kz saity 15 qazanǵa deiin táýlik boiy qoljetimdi bolmaq. Onlain sanaqtan ótpegender 1-30 qazan aralyǵynda interviýerlerdiń saýaldaryna jaýap bere alady. Barlyq saýaldar boiynsha 1446 bailanys ortalyǵyna habarlasýǵa bolady. Qońyraý shalý tegin. Qazaqstanda árkim mańyzdy!»,-delingen habarlamada.
