Foto Tengrinews.kz/Turar Qazanǵapov
Memleket basshysy Ulttyq quryltaidyń birinshi otyrysynda elimizdiń egemendigin nyǵaityp, demokratiia jolyn damytýdaǵy júzege asyp jatqan saiasi is-sharalarǵa toqtaldy. Saiasi júieni jańǵyrtý, prezidenttik bilikti shekteý jáne Parlamenttiń rólin arttyrý máselelerin kóterdi. Halyqtyń ómir súrý deńgeiin arttyrý, jumyssyzdyqty joiý jáne áleýmettik teńdikti qamtamasyz etý suraqtary talqylandy. Ekonomikalyq reformalardy júrgizý qajettiligi atap ótildi. Jańa Qazaqstan qurý jolynda eski kadrlardy, onyń ishinde qaryn maidy shiritip júrgen bir qumalaq demekshi, mamandar máselesine toqtaldy. Qazaq tiliniń mártebesin nyǵaitýǵa da erekshe tapsyrmalar berdi.
2023 jyly Túrkistanda ótken jiynda konstitýtsiialyq reformalar men Ádiletti Qazaqstan qurý jolyndaǵy is-sharalarǵa toqtaldy. Memleket basshysy azamattyq qoǵamnyń damýynyń arqasynda Qazaqstan burynǵy qalpynan aitarlyqtai ózgerip kele jatqanyn da eskerdi. Túpki maqsatqa jetý úshin saiasi-ekonomikalyq reforma jasaý jetkiliksiz ekenin alǵa tartyp, ár azamattyń sana-sezimi ózgerýi kerektigin aitty. «Adal azamat – adal eńbek» tujyrymdamasyn da dál osy otyrysta bekitti. Ádiletti Qazaqstan jáne Adal azamat uǵymdary el tiregi bolatyn egiz qundylyq retinde árdaiym qatar turýǵa tiis ekenin de basa aitty. Qazaqstan tarihy shynaiy jazylǵan jeti tomdyq eńbekti ázirleýdi tapsyrdy. Tarihymyzda erekshe orny bar tulǵalardyń biryńǵai tizimin ázirleýdi tapsyrdy. Mádeni muralarymyzdy jan-jaqty dáripteýdi de eskertti. Dál osy quryltaida Túrkistanǵa erekshe ataý berildi. Ideologiia jumysyndaǵy basty baǵyttardyń biri – kitap basyp shyǵarý isi. Sol sebepti ulttyq múddege sai keletin kitapty basyp shyǵarýdyń mańyzdylyǵyna da toqtaldy. Ulttyq qundylyqtardy nasihattaýdyń taǵy bir baǵyty ol - kino indýstriia. Aqsha tabý jolynda arzan filmder túsirýdi qoiý kerektigin de alǵa tartty. Jastardy qoldaý, bilim berý jáne tárbie júiesin jańǵyrtý, jastardyń qoǵamdyq ómirge belsendi qatysýyn arttyrý máseleleri de nazarǵa alyndy.
Biylǵy ótken quryltaida da birqatar ózekti máseleler talqylandy. Otyrys barysynda Prezident Qasym-Jomart Toqaev elimizdiń rýhani-ideologiialyq baǵytyn, turmys deńgeiin jaqsartý úshin mańyzdy áleýmettik-ekonomikalyq baǵdarlardy atap ótti.
Kóptegen máselelerdiń arasynda turmystyq zorlyq-zombylyq, býlling, vandalizm, jáne sý resýrstaryn paidalaný máseleleri erekshe nazarǵa alyndy. Toqaev qoǵamdaǵy qatygezdiktiń artýyna alańdaýshylyq bildirip, mádenietsizdik pen tabiǵatqa ziian keltirý jaǵdailaryna toqtaldy.
Sondai-aq, quryltaida qoǵamdyq rámizder men memlekettik simvolikanyń mańyzdylyǵy, atap aitqanda, gerbtiń dizainy týraly usynystar da kóterildi. Jalpy, quryltaida qozǵalǵan máseleler eldiń áleýmettik-ekonomikalyq damýyna qatysty kópshilik nazaryn aýdaratyn taqyryptar bolyp tabylady.
