CC0 / valelopardo /
Qarjy ministrligi 18 jasqa deiingi balalardyń shotyna Ulttyq qordyń investitsiialyq tabysynan jinalatyn aqshany aýyr syrqatty emdeýge jumsaý múmkindigin qarastyryp jatyr. Bul týraly qarjy vitse-ministri Dáýren Temirbekov málimdedi, dep habarlaidy Sputnik Qazaqstan.
Senatta ótken brifingte jýrnalister "Ulttyq qordyń aqshasyn aýyr syrqatqa shaldyqqan balalardyń emine jumsaýǵa ruqsat berý máselesi qarastyryla ma" dep surady.
"Biz sarapshylarmen kezdestik. Olardyń da aqshany basqa maqsattarǵa jumsaý múmkindigin qarastyrý týraly usynystary boldy. Biz ol múmkindikti qarastyryp jatyrmyz", - dep jaýap berdi Temirbekov.
Aitýynsha, qazirgi zańnamalyq túzetýler bul máseleni rettemeidi. Aqshanyń túrli maqsattarǵa jumsalýy normativtik-quqyqtyq aktilerde qaralady.
"Ulttyq qor – balalarǵa" jobasy boiynsha 18 jasqa tolǵannan keiin arnaiy shottaǵy aqsha balanyń menshiginde bolady. Qarajatty qalai jumsaý kerektigin ol ózi sheshedi. Bul rette Ulttyq qordyń investitsiialyq kirisiniń 50%-nan jinalǵan aqshany tek bilimge jáne baspana satyp alýǵa paidalanýǵa bolady.
Qarjynyń maqsatty jumsalatynyn rastaý úshin ókiletti organdarǵa bilim qyzmetin alý nemese turǵyn úi satyp alý týraly kelisimshart usyný kózdelip otyr. Qarajatty sheteldik joǵary oqý ornynda bilim alý úshin de paidalanýǵa bolady.
Al baspanany tek Qazaqstan aýmaǵynan ǵana satyp alýǵa ruqsat etiledi. Osy qarjyǵa satyp alynǵan úidi qaita satýǵa shekteý qoiylmaidy.
Aita keteri, "Ulttyq qor – balalarǵa" jobasy kelesi jyly bastalady.
