Qarjy ministri Erulan Jamaýbaev Ulttyq qordyń qazirgi jaǵdaiy týraly baiandady, dep habarlaidy "Ult aqparat".
«Biýdjettik protsestiń mańyzdy komponenti – ol Ulttyq qor. Biylǵy 1 maýsymdaǵy jaǵdai boiynsha onyń aktivi 27,6 trln teńgeni qurady, onyń ishinde valiýtalyq portfel 58,5 mlrd dollar. Atap aitqanda, 2020 jyldyń qorytyndysy boiynsha Ulttyq qor 744 mlrd teńgege ósti», - dedi E. Jamaýbaev halyq aldynda esep berýi kezinde.
Onyń aitýynsha, ministrlik tarapynan qordyń jinaq qyzmetin kúsheitýge baǵyttalǵan júieli jumystar júrgizilip jatyr.
«Osy oraida Ulttyq qordan kepildi transfert kólemin birtindep qysqartý boiynsha Biýdjet kodeksine túzetýler engizildi. Bul qadamdar Ulttyq qor aktivteriniń jinaqtalýyna yqpal etip, munaily emes tapshylyqty birtindep tómendetýge múmkindik beredi», - dedi ministr.
