Ulttyq bank azyq-túlik baǵasy óreskel qymbattaǵan óńirlerdi atady, dep habarlaidy QazAqparat.
«Jalpy el boiynsha azyq-túlik baǵasy bir aida 0,7% ósti. Ásirese Shyǵys Qazaqstan (1,2%), Pavlodar jáne Soltústik Qazaqstan (1,1%) oblystarynda qymbatshylyqtyń qarqyny qatty. Jemis pen kókenis baǵasy1,5% qymbattaǵan. Ásirese qyryqqabattyń baǵasy Almaty qalasynda 17,7% artty. Al jumyrtqanyń baǵasy Almatydan basqa óńirlerdiń bárinde kóterildi. Eń joǵarǵy ósim Atyraý oblysynda tirkeldi (30,2%)», - dep jazylǵan Ulttyq banktiń infliatsiia týraly saraptamasynda.
Resmi málimette, azyq-túlik taýaryn aýyzdyqsyz jibergen Shyǵys Qazaqstan oblysyndaǵy ahýal jeke taldanǵan.
«Óńirde joǵarǵy surypty bidai unynan pisirilgen nan 6,2%, qaraqumyq jarmasy 3,3%, jemis pen kókenis 3,4% qymbattady. Bul taýarlardyń respýblikalyq ortasha baǵasy 0,9%, 0,5% jáne 1,5% kóterilgen», - dep jazady Ulttyq bank mamandary. .
Shyǵys Qazaqstannan keingi orynda turǵan Pavlodar oblysynda 1-surypty bidai unynan pisirilgen nan 5,1%, qara bidai nany 2,9% qymbattaǵan.
Al Soltústik Qazaqstan jáne Aqtóbe oblystarynda et pen et ónimderi 2 jáne 1,3% qymbattaǵan.
«Aqtóbe oblysynda qus eti bir aida 8,6% qymbattady. Soltústik Qazaqstan oblysynda jylqy eti 2,9%, al qoi eti 3,8% qymbattady. Al respýblika boiynsha bul ónimderdiń baǵasy 0,3 jáne 0,4% ǵana kóterilgen», - delingen Ulttyq bank taldaýynda.
