Búgin Almaty oblysy Jambyl aýdanyndaǵy "Kókbastaý" ippodromynda Konstitýtsiia kúnine orai QR Tuńǵysh Prezidenti - Elbasy N.Nazarbaevtyń Kýbogy úshin ulttyq at sporty túrlerine dúbirli jarys ótti.
Osymen 21-shi jyl qatarynan ótkizilip kele jatqan jarysqa elimizdiń túkpir-túkpirinen jáne kórshi memleketterden jalpy sany 200-ge jýyq súigúlik qatysty.
Jinalǵandardy aldymen Almaty oblysynyń ákimi Amandyq Batalov quttyqtady.
- Búgin Konstitýtsiia kúnine orai ulttyq at sporty túrlerinen Elbasy Kýbogyna respýblikalyq jarys ótkizip otyrmyz. Bul sharany Almaty oblysynda jyl saiyn ótkizý dástúrge ainalǵan. Óitkeni Jetisý óńiri salt-dástúrge qurmetpen qarap, salamatty ómir saltyn nasihattaýǵa, ulttyq sporttyń damýyna erekshe nazar aýdaryp keledi. Elbasy Nursultan Ábishuly Nazarbaev «Uly dalanyń jeti qyry» atty maqalasynda jylqyny qolǵa úiretýdiń adamzat tarihyndaǵy róline, halqymyzdyń atqa miný mádenieti men jylqy sharýashylyǵynyń qyr-syryna erekshe toqtalǵan bolatyn. Sol Dala órkenietiniń jańa dáýirdegi zańdy jalǵasy retinde ulttyq at sporty túrlerinen osyndai jarystardy ótkizýdiń mańyzy zor. «At – er qanaty» deitin halqymyzdyń aýdaryspaq, qyz qýý, jamby atý, alaman báige, teńge alý siiaqty ulttyq oiyn túrleri de ǵasyrdan ǵasyrǵa jalǵasyp keledi. Búgingi jarysta atalǵan oiyndardyń mán-mańyzyna, sán-saltanatyna sportsúier qaýym tánti bolady dep oilaimyn, - degen oblys ákimi shabandozdarǵa sáttilik tilep, jarysty saltanatty túrde ashyp berdi.
Munan soń sóz alǵan Jambyl aýdany aqsaqaldarynyń batasynan keiin báigege qatysýshylar jarysty bastap ketti.
Jarys qorytyndysy boiynsha tai jarysynda oq boiy ozyp kelgen Jambyl oblysynan qatysqan "Shónger" atty júirik 200 myń teńgeniń aqshalai syilyǵyna ie boldy.
2-shi orynmen Talǵar aýdanynan kelgen Bulǵynov Merhat esimdi shabandoz tizgindegen "Káýsar" atty tai máre syzyǵyn kesip, shabandozyna 150 myń teńgege berildi.
3-shi oryn Qyrǵyz Respýblikasynan kelgen "Asanbek ata" jylqy sharýashylyǵyna tiesili "Bereke" atty sáigúlikke buiyrdy. Júldesi - 70 myń teńge.
9 shaqyrymdyq jorǵa attar jarysynda Qyrǵyz Respýblikasynyń atynan qatysqan "Qabylan" atty júirik birinshi keldi. Máre syzyǵyn ekinshi bolyp Atyraý oblysynyń "Asýar" atty jorǵasy kesti. Úzdik úshtikti Qyrǵyz Respýblikasynan topqa túsken "Lepýchii" atty júirigi túiindedi.
11 shaqyrymdyq qunan báigede Qarasai aýdanynyń "Qarlyǵashy" birinshi oryndy ielendi. Ekinshi bolyp top jarǵan - Jambyl oblysynyń "Álqisa" sáigúligi. Baby jarasyp, úzdik úshtikten kóringen Almaty qalasynyń "Muzbalaq" atty qunany. Jorǵa jarysy men qunan báige jeńimpazdaryna sáikesinshe "Lada Granta" avtokóliginiń kilti, 150 jáne 120 myń teńge tabystaldy.
16 shaqyrymǵa sozylǵan top báigede 1-oryndy Alakól aýdanynyń atynan topqa qosylǵan "Shymbulaq" atty sáigúlik ielendi. Jeńimpazǵa "Niva" avtokóliginiń kilti tabystaldy. 2-oryn ielengen Talǵar aýdanynyń "Ǵasyr" atty júiriginiń iesi "Lada Granta" avtokóligin qanjyǵasyna bailady. 3-shi oryn Qarasai aýdanynyń júirigi "Don Franchesko" atty tulparyna buiyryp, iesi 150 000 teńgeniń sertifikatymen marapattaldy.
Osydan keiin 25 shaqyrymdyq Alaman báigeniń de kezegi kelip jetti. Oǵan elimizdiń ár túkpirinen 40-qa jýyq júirik qosyldy. Nátijesinde jeke dara ozyp, topty jarǵan Qarasai aýdanynyń "Qarakóz" atty júirigin tizgindegen Baiǵurman Sabyrjanǵa "ÝAZ Patriot" avtokóliginiń kilti tabystaldy. Máre syzyǵyn ekinshi bolyp kesken Qyrǵyzdan kelgen "Zara" atty sáigúliktiń iesine "Niva" avtokóliginiń kilti syiǵa berildi. Sondai-aq úshinshi oryndy Almaty qalasynyń "Qarakózi", tórtinshi oryndy Qyzylorda oblysynyń "Qarlyǵash" atty júirikteri ielendi. Júldegerlerge sáikesinshe "Lada Granta" avtokóligi men 200 myń teńgeniń aqshalai sertifikaty tabystaldy.
Jalpy at jarystardyń utysyna 7 avtokólik jáne 2 mln. 300 myń teńge aqshalai júlde tigildi.
Almaty oblysy ákimdiginiń resmi saity
