Astanada feldsher Uldana Myrzýannyń ólimine qatysty sot otyrysynda onyń kúieýi Ádilet Zeinelden jaýap alý jalǵasty. Sotta ol otbasyǵa Astana ákimdiginen berilgen 20 mln teńgeniń qalai jumsalǵanyn aityp berdi. Sondai-aq jábirlenýshi mártebesinen ne sebepti bas tartqanyn túsindirdi, dep habarlaidy ult.kz.
Ádilet Zeineldiń aitýynsha, Uldanany jerlegennen keiin, 2025 jylǵy 19 qarashada ony marqumnyń ápkesi Aqnurmen birge Astana ákimdigine shaqyrǵan. Kezdesýge qala ákimi, onyń orynbasary jáne máslihat depýtaty qatysqan.
Sotta Ádilet otbasyǵa 20 mln teńge qolma-qol berilgenin aitty. Onyń sózinshe, aqshany alǵan kezde eshqandai qolhat nemese ózge qujatqa qol qoimaǵan.
Keiin bul qarajat birneshe maqsatqa jumsalǵan. Onyń ishinde shamamen:
9,2 mln teńge – avtokólik nesiesin óteýge;
4,3 mln teńge – Uldananyń nesie boiynsha mindettemelerin jabýǵa;
4,5 mln teńge – marqumnyń anasyna berilgen.
Qalǵan qarjy túrli shyǵyndarǵa, sonyń ishinde qaiyrymdylyqqa jumsalǵan.
Sot barysynda Ádilet Zeineldiń jábirlenýshi mártebesinen bas tartqany da talqylandy. Sýdia onyń bul sheshiminiń sebebin surady.
Ádilet Zeinel qazirgi ýaqytta jańa ómir bastaǵanyn, qaita úilengenin jáne budan bylai Uldananyń múddesin onyń anasy qorǵaǵanyn qalaitynyn aitty.
— Men jańa ómir bastadym, úilendim. Budan ári Uldananyń múddesin onyń anasy qorǵaǵanyn qalaimyn. Ózi de buǵan deiin BAQ-qa bergen suhbatynda jábirlenýshi mártebesinen bas tartýymdy aitqan bolatyn, — dedi ol.
Sýdia Ádilettiń jábirlenýshi mártebesinen óz erkimen bas tartqanyn naqtylady. Ol buryn bul mártebeden bas tartýdy josparlamaǵanyn da rastady.
Buǵan deiin sotta qorǵaýshy Ashat Álimovtiń sýdia Merýert Abaevaǵa qarsylyq bildirgeni belgili bolǵan. Alaida qarsylyqty qaraǵan sýdia Samat Sembaev ony qanaǵattandyrmady. Onyń aitýynsha, qorǵaýshy keltirgen ýájder sýdianyń istiń nátijesine jeke múddeli ekenin dáleldemeidi.
Feldsher Uldana Myrzýannyń ólimine qatysty sot otyrysy jalǵasyp jatyr. Is boiynsha sottalýshy – PIK tóraǵasy Sáýle Jubaniiazova.
