Ýkrainanyń Lýtsk qalasynyń ortasynda er adam ishinde jolaýshylar otyrǵan avtobýsty tutqynǵa aldy. Bul týraly ÝKRINFORM agenttigi habarlady.
«Lýtsk qalasynyń ortasynda belgisiz er adam avtobýs jolaýshylaryn tutqynǵa alyp, avtobýsty jaryp jiberem dep qorqytyp otyr. Bul týraly ol politsiiaǵa 21 shilde kúni habarlady. Qylmysker qolynda granata men basqa da avtomatty qarý bar ekenin aitqan», - delingen habarlamada.
«Jaǵdai qadaǵalanyp otyr. Qala ortalyǵy jabyldy, eshkim zardap shekpes úshin ol jerge adamdardy jibermeýge tyrysyp jatyrmyz. Qala turǵyndary men qonaqtarynan jaǵdaiǵa túsinistikpen qarap, jaqyn barmaýyn ótinemiz», - dep atap ótti Ulttyq politsiianyń Volyn oblysyndaǵy bas basqarmasynyń bastyǵy Iýrii Kroshko.
Onyń aitýynsha, avtobýsty tutqynǵa alǵan adam júiege qarsy narazylyǵyn osylai bildirip otyr. Er adam óz talaptaryn Tvitterde jariialaǵan, al politseiler qazirgi kezde onyń paraqshasyna monitoring júrgizip, oǵan telefon shalýǵa árekettenip jatyr.
Qandai qarýdan oq atylǵany ázirge belgisiz. Zardap shekkender joq. Kroshko bul arnaiy oqý-jattyǵý emes ekenin atap ótti.
