Seisenbi kúni Ýkraina qorǵanys ministrliginiń bas barlaý basqarmasy Reseimen tutqyn aiyrbastalǵanyn habarlady. Bul málimetke qaraǵanda, eki ofitser, 14 jaýyngerden turatyn Ýkrainanyń 16 áskeri qyzmetkeri jáne bir beibit adam Reseidiń 15 jaýyngerine aiyrbastalǵan, dep jazady Azattyq.
"Ýkrainskaia pravda" basylymynyń habaryna qaraǵanda, bostandyqqa shyqqan ýkrain jaýyngerleriniń arasynda osydan eki ai buryn tutqynǵa túsken áskeri-teńiz kúshteriniń qyzmetkerleri men desanttar bar. Bes jaýynger aiyrbasqa deiin Resei aýrýhanalarynda jatqan, aýyr jaralanǵan taǵy bes jaýynger shuǵyl emdeýdi kerek etedi.
Tutqyndar Herson jáne Nikolaevsk oblystarynyń shekarasynda aiyrbastalǵan. Bul aýmaq qazir Resei áskeriniń baqylaýynda tur.
Resei qorǵanys ministrligi tutqyn aiyrbasy jóninde habar taratqan joq.
Resei áskeri Ýkrainaǵa basyp kirgennen keiin eki tarap birneshe ret tutqyn almasqan. Áskeri sarapshylardyń baǵalaýyna qaraǵanda, Resei jaǵynda tutqynda otyrǵan ýkrain jaýyngerleri kóbirek. Alaida bul jóninde qandai da bir resmi aqparat joq.
