Batys Qazaqstan oblysynda 2516 otbasynyń ataýly áleýmettik kómek alýynyń zańdylyǵy tekserildi, dep habarlaidy "Ult aqparat".
QR Eńbek jáne halyqty áleýmettik qorǵaý ministrliginiń málimetinshe, tekserý nátijesinde atalǵan otbasylardyń 586-syna tólem ýaqytsha toqtatylyp, taǵy 508 otbasyna tólem múldem tólenbeitin boldy.
Oblystyq jumyspen qamtýdy úilestirý jáne áleýmettik baǵdarlamalar basqarmasynyń bólim basshysy Qaiyrǵali Nadyrǵalievtiń aitýynsha, AÁK taǵaiyndaý kezinde eń kóp taralǵan buzýshylyq naqty tabystardy jasyrý bolyp otyr.
«Oralda alty balanyń anasy ótken jyldyń jeltoqsan aiynan bastap AÁK ala bastady. Áleýmettik kómek alýdyń zańdylyǵyn tekserý barysynda biz otbasynyń naqty tabysynyń jasyrylǵanyn anyqtadyq. 2018 jyly jeke kásipker retinde tirkelgen otaǵasynyń 6 million 904 myń 550 teńge kólemindegi tabysyn jasyrǵan. Osy jyldyń birinshi jartyjyldyǵyndaǵy salyq esepteri boiynsha otbasynyń tabysy 3 million 877 myń teńgeni quraǵan. Qaita esepteý nátijesinde otbasyna AÁK tóleýden bas tartyldy», – dedi Qaiyrǵali Nadyrǵaliev.
Osyǵan uqsas jaǵdai Jańaqala aýdanynda da oryn aldy. Ótken jyldyń sáýir aiynda «Eńbek» nátijeli jumyspen qamtýdy jáne jappai kásipkerlikti damytýdyń memlekettik baǵdarlamasy aiasynda ótinish berýshiniń qaiyn atasy 5 million 200 myń teńge kóleminde kredit alyp, ol qarajatqa 17 iri qara mal satyp alǵan.
«Ótinish berýshiniń birge turyp jatqan qaiyn atasy jeńildetilgen kreditke satyp alǵan iri qara maldy kórsetpesten otbasynyń naqty tabysyn jasyrǵanyn eskere otyryp, oǵan 1 mln 530 myń 612 teńge kóleminde AÁK tóleý toqtatyldy. Sáýir men mamyr ailarynda 255 myń 100 teńge kóleminde tólengen qarajat biýdjetke qaitaryldy», – dedi Nadyrǵaliev.
2019 jylǵy 16 qyrkúiektegi jaǵdai boiynsha BQO-nyń 59 myń 566 turǵyny nemese 11 myń 778 otbasy 3,7 mlrd teńge kóleminde AÁK aldy.
Esterińizge sala keteiik, AÁK taǵaiyndaý men tóleýdiń durystyǵyn monitoringteý nátijesinde 72 myńnan astam ataýly áleýmettik kómek alýshy tabysy týraly jalǵan aqparat bergeni anyqtaldy. Osyǵan bailanysty Ministrlik ákimdiktermen birlese otyryp, árbir anyqtalǵan fakti boiynsha buzýshylyqtarǵa jol bermeý jáne «Memlekettik ataýly áleýmettik kómek týraly» QR Zańyn buzyp zańsyz taǵaiyndalǵan tólemderdi qaita qaraý boiynsha jeke-jeke jumys júrgizýde. Bul baǵyttaǵy jumys jalǵasyp jatyr.
