Búgin Premer-Ministrdiń orynbasary Gúlshara Ábdiqalyqova bastaǵan Úkimet músheleri Qaraǵandy oblysyna jumys saparyn jalǵastyrdy, dep habarlaidy "Ult aqparat" primeminister.kz saityna silteme jasap.
Vitse-premer Respýblikalyq úsh jaqty komissiia otyrysyn ótkizdi. Oǵan qala jáne aýdan ákimderi, «Atameken» UKP, iri kompaniialardyń, biznes-qurylymdardyń jáne kásipodaq uiymdarynyń basshylary qatysty. Otyrysta áleýmettik-eńbek qatynastary, áleýmettik áriptestik, qyzmetkerlerdiń eńbek quqyqtaryn qorǵaý, «Birlestikterdiń bostandyǵy jáne kásipodaqtarǵa birigý quqyǵyn qorǵaý týraly» № 87 Konventsiiany qoldaný jónindegi Halyqaralyq eńbek uiymdarynyń usynystary boiynsha Jol kartasyn júzege asyrý máseleleri qaraldy.
Otyrysty ashý kezinde Gúlshara Ábdiqalyqova áleýmettik áriptestiktiń áreket etýshi modeli memleket, jumys berýshi jáne jumysker arasyndaǵy jaýapkershilikti teń dárejede bólýge negizdelgendigine erekshe nazar aýdardy. Áleýmettik áriptestik salasyndaǵy negizgi mindetterdiń biri — áleýmettik-eńbek daýlarynyń aldyn-alý. Sondyqtan áleýmettik áriptestiktiń barlyq qatysýshylary óndiristik jaraqattyń, jalaqynyń ýaqytyly tólenbeýiniń, aýmaqtarda áleýmettik ýshyǵýdyń monitoringiniń kúsheiýine jol bermeý máselelerin jáne t.b. erekshe baqylaýǵa alý qajet.
Kásibi syn-tegeýrinderdi basqarýdyń qazirgi kezdegi júiesin engizý maqsatynda 1 sáýirden bastap 2231 kásiporyn eńbek qaýipsizdigi jáne eńbek qorǵaý standarttaryn engizdi. 184,9 myń jumys berýshi tómen jalaqy alatyn 963 myń jumyskerdiń eńbek aqysyn ósirdi. Sonyń nátijesinde olardyń jalaqysy 33%-ǵa kóterildi (43 myńnan 57,5 myń teńgege deiin). Elimiz boiynsha barlyǵy 98,7 myń ujymdyq kelisimshart jasalǵan, onyń ishinde 95,1% iri jáne orta kásiporyndarda ujymdyq kelisimsharttar bar.
Ári qarai Abai qalasynyń Mádeniet úiinde QR Vitse-premeri jáne jumys tobynyń músheleri kóp balaly analarmen, az qamtylǵan otbasylarmen, eńbek ardagerlerimen, múmkindikteri shekteýli jandarmen, muǵalimdermen, dárigerlermen, jurtshylyq ókildermen kezdesý ótkizdi.
QR Premer-Ministriniń orynbasary óz sózinde jańa áleýmettik saiasattyń basymdylyǵy halyqtyń az qamtylǵan otbasylarynyń kirisin kóterý, turǵyn-úi máselesin sheshý, bilim berý jáne meditsina qyzmetiniń sapasyn arttyrý, aýmaqtardy keshendi damytý ekenin atap kórsetti. Erekshe nazar aýdarǵany, basty mindet — adamdardy jumyspen qamtý, al áleýmettik kómek obektivti sebepterge bailanysty óz betinshe eńbek ete almaityn adamdarǵa kórsetiledi.
Jumys tobynyń basqa músheleri óz baǵyttary boiynsha Elbasynyń «Áleýmettik qamqorlyq» jańa áleýmettik sharalaryn túsindirdi. Sońynda jumys tobynyń músheleri zaldan kelip túsken suraqtarǵa jaýap berdi.
Osy kúni bilim jáne ǵylym ministri K. Shámshidinova jáne densaýlyq saqtaý ministri E. Birtanov, Qurylys jáne turǵyn úi-kommýnaldyq sharýashylyq isteri komitetiniń tóraǵasy M. Jaiymbetov Qaraǵandy jáne Abai qalalarynyń muǵalimderimen, dárigerlerimen, qurylys kompaniialarynyń jumyskerlerimen kezdesti. Kezdesýlerde bilim berý jáne densaýlyq saqtaý salalaryn ári qarai damytý, qurylys nysandarynyń sapaly jáne merziminde aiaqtalýy sekildi ózekti máseleler talqylandy.
Úkimet delegatsiiasynyń jumysy Soltústik Qazaqstan oblysynda jalǵasady.
