Foto: Pexels.com
Qazaqstan Úkimeti meditsinalyq kómektiń sapasyn basqarýdy jetildirýge arnalǵan 2026–2030 jyldarǵa arnalǵan keshendi jospardy bekitti, dep habarlaidy Ult.kz.
Tiisti qaýlyǵa Premer-ministr Oljas Bektenov qol qoiǵan. Qujat Memleket basshysynyń «Jasandy intellekt dáýirindegi Qazaqstan: ózekti máseleler jáne ony túbegeili tsifrlyq ózgerister arqyly sheshý» atty Qazaqstan halqyna Joldaýynda berilgen tapsyrmalardy oryndaý aiasynda ázirlengen.
Jospardyń negizgi maqsaty
Keshendi jospardyń basty maqsaty – patsient meditsinalyq qyzmet sapasyn baǵalaý jáne baqylaý protsesterine belsendi qatysatyn júie qalyptastyrý. Qujat meditsinalyq kómektiń sapasy men qaýipsizdigin turaqty jaqsartýǵa, protsesterdiń ashyqtyǵyn qamtamasyz etýge jáne retteý tiimdiligin arttyrýǵa baǵyttalǵan.
Tórt strategiialyq baǵyt
Josparda júieni damytýdyń tórt negizgi baǵyty aiqyndalǵan:
meditsinalyq qyzmet kórsetý salasyndaǵy retteýshi quraldardy jańǵyrtý;
jasandy intellekt tehnologiialaryn paidalana otyryp, sapa saraptamasynyń jańa modelin engizý jáne Ulttyq sapa institýtyn qurý;
kásibi meditsinalyq qaýymdastyq pen patsientterdiń rólin kúsheitý;
sapany basqarý júiesin tsifrlyq transformatsiialaý.
Tsifrlandyrý jáne jasandy intellekt
Qujatqa sáikes, meditsinalyq qyzmet sapasyn baqylaý men basqarý júiesi derekterge, tsifrlyq quraldarǵa jáne jasandy intellekt tehnologiialaryna negizdelgen jańa modelge kóshedi.
Sapany basqarý júiesinde tsifrlyq transformatsiia júrgizilip, profilaktikalyq baqylaý júiesi engiziledi. Sondai-aq sarapshylarǵa arnalǵan avtomattandyrylǵan jumys orny qurylyp, litsenziiadan keiingi baqylaý protsesteri tolyq tsifrlandyrylmaq.
Akkreditatsiia jáne monitoring
Zańnamalyq ózgerister aiasynda 2028 jyldan bastap tegin meditsinalyq kómektiń kepildik berilgen kólemi men mindetti áleýmettik meditsinalyq saqtandyrý júiesinde qyzmet kórsetetin meditsinalyq uiymdarǵa mindetti akkreditatsiia engizý josparlanyp otyr.
Sonymen qatar akkreditatsiiadan keiingi monitoring te tsifrlyq formatqa kóshiriledi. Nátijesinde meditsinalyq uiymdardy litsenziiadan keiingi monitoringpen qamtý deńgeii 70%-ǵa jetip, olardyń keminde 80%-y jańa standarttar boiynsha akkreditteledi.
Ulttyq sapa institýty qurylady
Jospar aiasynda Densaýlyq saqtaýdy damytýdyń ulttyq ǵylymi ortalyǵy bazasynda Ulttyq sapa institýtyn qurý kózdelgen. Institýt ádisnamalyq jáne taldamalyq ortalyq retinde jumys isteidi.
Onyń qyzmeti Dúniejúzilik densaýlyq saqtaý uiymynyń tehnikalyq qoldaýymen júzege asyp, patsient qaýipsizdigi boiynsha halyqaralyq standarttardy engizýge múmkindik beredi.
Patsientterdiń róli kúsheiedi
Keshendi jospar meditsinalyq qaýymdastyq pen patsientterdiń rólin arttyrýdy da qarastyrady. Kásibi birlestikter sapany táýelsiz saraptaýǵa jáne mamandardyń klinikalyq oilaýyn baǵalaýǵa tartylmaq.
Al patsientterdi qoldaý qyzmetin tsifrlandyrý azamattardyń ótinishterine naqty ýaqyt rejiminde jedel jaýap berýge jaǵdai jasaidy.
Negizgi nátijeler
Josparǵa sáikes:
2027 jyly sapa saraptamasynyń úsh komponentti modeli engiziledi;
2028 jylǵa deiin meditsinalyq kómek kórsetý standarttary tolyq tsifrlandyrylady;
2028 jylǵa qarai meditsinalyq kómektiń sapasy men kólemin baqylaýdyń keminde 20%-y jasandy intellekt arqyly júzege asyrylady.
Úkimettiń málimetinshe, jospardy iske asyrý meditsinalyq kómektiń sapasyn retteýdiń biryńǵai júiesin qalyptastyrýǵa, meditsinalyq uiymdar qyzmetiniń ashyqtyǵyn arttyrýǵa jáne basqarýshylyq sheshimderdi obektivti derekter negizinde qabyldaýǵa múmkindik beredi. Sonymen qatar 2030 jylǵa qarai meditsinalyq qyzmetterdiń negizgi sapa kórsetkishterin jaqsartý josparlanyp otyr.
