QR Premer-Ministri Asqar Mamin Almaty qalasyna jumys sapary barysynda Almaty aglomeratsiiasyn damytý máseleleri jóninde keńes ótkizdi, dep habarlaidy "Ult aqparat" Úkimet basshysynyń baspasóz qyzmetine silteme jasap.
Premer-Ministrdiń orynbasary Roman Skliar, Almaty qalasynyń ákimi Baqytjan Saǵyntaev, Almaty oblysynyń ákimi Amandyq Batalov baiandama jasady. Dúniejúzilik banktiń Ortalyq Aziia boiynsha baǵdarlamalar úilestirýshisi Sasha Djýmena aglomeratsiialardy damytý boiynsha álemdik tájiribeni qoldaný týraly baiandady.
Talqylaýǵa energetika ministri Nurlan Noǵaev, ekologiia, geologiia jáne tabiǵi resýrstar ministri Maǵzum Myrzaǵaliev, tsifrlyq damý, innovatsiialar jáne aeroǵarysh ónerkásibi ministri Baǵdat Mýsin jáne t. b. qatysty. Memleket basshysy Qasym-Jomart Toqaevtyń biylǵy 17 naýryzda Almaty qalasynyń áleýmettik-ekonomikalyq damý máseleleri jónindegi keńeste bergen tapsyrmalarynyń oryndalý barysy qaraldy.
Biryńǵai integratsiialanǵan kólik júiesin qurý, injenerlik, turǵyn úi, týristik jáne áleýmettik infraqurylymdy damytý, bilim berý jáne densaýlyq saqtaý, kásipkerlik jáne investitsiialar tartý, qorshaǵan ortany qorǵaý jáne Almaty aglomeratsiiasynyń eldi mekenderin gazdandyrý, sondai-aq Almaty qalasynyń ainalasyndaǵy azyq-túlik beldeýin nyǵaitý jobalary talqylandy.
Almaty aglomeratsiiasyn damytý jónindegi óńiraralyq is-sharalar jospary 2030 jylǵa deiin 108 is-sharany oryndaýdy kózdeidi. Josparlaý kezinde paidalanylǵan boljamdarǵa sáikes, Almaty qalasynyń turǵyndaryn qosa alǵanda, Almaty aglomeratsiiasynyń halqy 2030 jylǵa qarai 1,6 mln adamǵa ulǵaiady jáne 4,7 mln adamnan asady, olar 860 myń ga astam aýmaqqa qonystanady. 2020 jyldan bastap jospardyń 60 tarmaǵy boiynsha jobalardy iske asyrý bastaldy, olardyń 13-i aiaqtaldy.
Premer-Ministr biylǵy 20 tamyzǵa deiin «Úlken Almatynyń» tórt pilottyq jobasyn iske asyrý: ekologiialyq problemalardy sheshý (Green Almaty), biryńǵai kólik modelin jáne damý strategiiasyn ázirleý, ShOB tsifrlyq kartasyn qalyptastyrý, monitoring pen TJ aldyn alýdyń keshendi júiesin ázirleý máselelerin pysyqtaýdy tapsyrdy. Tsifrlyq damý, innovatsiialar jáne aeroǵarysh ónerkásibi ministrligine biylǵy 1 qarashaǵa deiin Almaty qalasynda tsifrlyq tehnologiialardy (AT-qumsalǵyshtar) damytý jóninde sharalar qabyldaý tapsyryldy.
Indýstriia jáne infraqurylymdyq damý ministrligine biylǵy 20 qazanǵa deiin aglomeratsiianyń biryńǵai kólik modelin ázirleý tapsyryldy.
Almaty qalasyna jumys sapary aiasynda Úkimet basshysyna Almaty qalasy halyqaralyq áýejaiynyń jańa terminalyn salý jobasy usynyldy, ol jyldyq jolaýshylar ainalymyn 6 mln adamǵa ulǵaitýǵa múmkindik beredi. Iske asyrý merzimi – 2021-2023 jyldar.
A. Mamin «Aiýsai» sel ustaityn bógetiniń, sondai-aq Almaty qalasynyń kólik jáne áleýmettik infraqurylym nysandarynyń qurylys alańdaryna bardy.
