Eýropalyq fýtbol qaýymdastyqtary odaǵy (UEFA) koronavirýs pandemiiasyna bailanysty qalyptasqan jaǵdaiǵa qaramastan, 2021/22 jylǵy maýsymnan Chempiondar ligasy men Eýropa ligasynan bólek taǵy bir klýbtyq jarys – Konferentsiialar ligasyn uiymdastyrýdy kózdep otyr, dep habarlaidy "Ult aqparat".
Britandyq The Guardian basylymynyń jazýynsha, bul týraly UEFA basshysy Aleksander Cheferin málim etken.
«Biz 2021/22 jylǵy maýsymnan bastap Konferentsiialar ligasyn ótkizýdi bastaimyz. Ony keiinge qaldyrmaimyz», - dep atap ótken Cheferin.
Konferentsiialar ligasynyń toptyq kezeńinde segiz topqa bólinetin 32 komanda oinaidy. Kvartet jeńimpazdary aqtyq jarystyń 1/8 kezeńine ótedi, ekinshi oryn enshilegen komandalar Eýropa ligasynyń toptyq kezeńinde úshinshi oryn alǵan klýbtarmen plei-offqa shyǵý úshin básekelesedi. Jarys jeńimpazy kelesi maýsymda Eýropa ligasynda oinaýǵa múmkindik alady.
