Bilim jáne ǵylym ministrligi 2016 jylǵy keshendi testileýdi qaita tapsyrý nátijelerin jariialady. Atalǵan shara tamyzdyń 19 – 21-i aralyǵynda Qazaqstannyń barlyq aimaqtarynda uiymdastyryldy. Oǵan ulttyq biryńǵai testileýde tómengi ball deńgeiine jete almaǵandar, testke múldem qatyspaǵandar, keshendi testileýde tómengi upai jinai almaǵandar, sondai-aq nátijeleri joiylǵan azamattar qatysty. UBT-ny qaita tapsyra almaǵandar birinshi kýrsqa qabyldanady. Alaida kelesi kýrsqa ótý úshin báribir test tapsyryp, eń tómenge upai sanyn jinaý qajet, dep habarlaidy Ult.kz tilshisi ministrliktiń resmi saityna silteme jasap.
Resmi aqparatqa sáikes, keshendi testileýdi qaita tapsyrýǵa jalpy 45025 adam ótinish bildirgen bolatyn. Alaida naqty qatysqandardyń sany – 41801. Sonyń 27306-sy – qazaq tilinde oqýǵa nietti adamdar, 14495-si – orys tilinde oqýdy tańdaǵandar.
«Testileý nátijeleri boiynsha tómengi ball deńgeiine 23778 adam (56,884%) jete almady. UBT erejelerin buzǵany úshin 104 talapker testileýden shettetilip, olardyń kórsetken nátijeleri joiyldy», - delingen resmi habarlamada.
Aita keteiik, biyldan bastap talapkerlerdi moraldyq-psihologiialyq turǵydan qorǵap, olardyń joǵary bilim alý múmkindikterin edáýir arttyrý úshin birqatar ózgerister jasalǵan bolatyn. Atap aitqanda, Ulttyq biryńǵai testileý men keshendi testileý nátijeleri boiynsha eń tómengi ball deńgeiinen asa almaǵan talapkerler testileýdi aqyly negizde qaita tapsyra alady. Al qaita testileý nátijesi boiynsha eń tómengi upai da ala almasa, talapker joǵary oqý ornyna aqyly negizde, kúndizgi oqý bólimderine alǵashqy akademiialyq kezeńniń aiaǵyna deiin (1-kýrstyń sońyna deiin) qabyldanady. Osyndai shart negizinde qabyldanǵan azamattar birinshi akademiialyq kezeńnen keiin qaita testileýden ótedi. Tómengi upai deńgeiinen assa, kelesi kýrsqa aýysady. Odan asa almasa, oqýdan shyǵarylady.
Ult portaly
