Myńdaǵan qazaqstandyq mektep túlegi úlken ómirge qadam basyp jatyr jáne olar úshin alǵashqy tramplin - mamandyq tańdaý, UBT tapsyrý jáne joǵary oqý ornyna túsý. QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev tańdaýdy qalai jasaý kerek ekenin, neden bastap, ne nársege daiyn bolý keregin aitty, dep habarlaidy QazAqparat.
Eń aldymen, Á. Toibaev bolashaq mamandyqty tańdaýǵa úlken jaýapkershilikpen qaraýdy, eńbek naryǵynda kásiptiń suranysqa ie bolýyn eskere otyryp, keleshegin baǵalaýdy usyndy. Departament direktory bul protseske ata-analary men jaqyndaryn da qatystyrýǵa, tipti synyp jetekshisimen keńesýge shaqyrdy. Bala óziniń múmkindikterin, mamandyqqa beiimin, áleýetin túsinýi qanshalyqty mańyzdy ekenin atap ótti.
«Árine, óz beiimińizdi eskere otyryp, bolashaǵyńyzdy qalai elestetetinińizdi, aldaǵy josparlaryńyzdy odan ári qalai iske asyratynyńyzdy da esepke alǵan jón. Eger siz jaratylystaný ǵylymdaryna kóbirek beiim bolsańyz, tiisti baǵytty tańdaýdy usynamyz, gýmanitarlyq salada da osylai. Kelesi qadam – mamandyq sáikes keletin beiindi pánderdi anyqtaý. Beiindik pánderi bar bilim baǵdarlamalary toptarynyń tizbesin Ulttyq testileý ortalyǵynyń saitynan tabýǵa bolady», - dep bólisti Ádilet Toibaev.
Oqýǵa túsýshi Ulttyq biryńǵai testileý tapsyrady. UBT nátijelerin eskere otyryp, odan ári bilim berý grantyn taǵaiyndaý boiynsha konkýrsqa qujattar tapsyrý kezeńi júrgiziledi. Bul rásim 13-20 shilde aralyǵynda Elektrondyq úkimet portaly arqyly júzege asyrylady.
«Eger talapker kámeletke tolmaǵan bolsa jáne ETsQ-sy bolmasa, ony zańdy ókildiń qatysýymen jasaýǵa bolady. Eger túsýshiniń ETsQ-sy bar bolsa, ol qujattardy ózi bere alady, biraq buny ata-anasynyń qatysýymen jasaýdy usynamyn. Elektrondyq úkimet saitynda bilim berý baǵdarlamalarynyń naqty toptaryn, JOO-ny tańdaýǵa jáne konkýrsqa qatysýǵa ótinish jiberýge bolady. Ótinishke bilimi týraly qujatty, UBT sertifikatyn, 086-Ý nysanyndaǵy meditsinalyq anyqtamany, jeke basyn kýálandyratyn qujattyń kóshirmesin qosa tirkeý qajet. Oqýǵa túsýshi konkýrs qorytyndysy boiynsha granttyń taǵaiyndalǵan nemese taǵaiyndalmaǵany týraly jaýapty portalda alady. Eger jaýap oń bolsa, siz grant týraly elektrondyq kýálik alasyz», - dedi Joǵary jáne joǵary oqý ornynan keiingi bilim departamentiniń direktory.
Odan keiin portaldan grant jeńip alǵan JOO-ǵa tirkelýge ótinish beresiz, osy jerde jataqhanadan oryn alýǵa da ótinish tapsyrasyz. .
«Munymen qabyldaý rásimi aiaqtalmaitynyn aita ketý kerek. Talapker belgilengen merzimde JOO-ǵa kelip, bilim berý qyzmetin kórsetý týraly shart jasasýy tiis. Eger muny jasamasa, onda tirkeý júzege asyrylmaidy jáne zańdy kúshine enbeidi», - dep túsindirdi Ádilet Toibaev.
