Almatyda Áliia Nazarbaeva kitabynyń tusaýkeseri men Doshan Joljaqsynovtyń 70 jyldyǵyna orai ótken jiynǵa bailanysty birqatar adamǵa aiyppul salyndy. Bul týraly brifing kezinde qalanyń bas sanitar dárigeri Jandarbek Bekshin málimdedi, dep habarlaidy Sputnik Qazaqstan tilshisi.
"Qalada tirkelgen jaǵdailar boiynsha monitoring toptary jumys istep jatyr. Anyqtalǵan buzýshylyqtar boiynsha zańdy tulǵalarǵa 250 million teńge kóleminde 724 aiyppul salyndy. Jeke tulǵalarǵa 5 699 aiyppul salyndy, bul 252 million teńgeni qurady", - dedi Bekshin.
Aitýynsha, zańsyz jiyn ótkizgeni úshin "Arial" golf klýbynyń basshysyna ákimshilik quqyqbuzýshylyq týraly hattama toltyrylyp, 670 myń teńge aiyppul salyndy. Bul jerde 9 qazanda alty myńnan asa adam jinalǵan piknik bolǵan. Bul jiyndy uiymdastyrǵan adamǵa 87 myń teńge aiyppul salǵan.
"Doshan Joljaqsynovtyń mereitoiy ótken "Svetlana" meiramhanasynyń iesine 670 myń teńge aiyppul salyndy. Abai atyndaǵy opera jáne balet teatrynda "Mesto sily" kitabynyń tusaýkeserine bailanysty teatrdyń direktoryna 670 myń teńge mólsherinde aiyppul salyndy. Baian Alagózova da "Le Dome" meiramhanasynda joldasynyń týǵan kúnin toilaǵan. Meiramhana iesine dál osy mólsherde aiyppul salyndy", - dedi Bekshin.
Aita keteri, qyrkúiekte Qazaqstannyń tuńǵysh prezidentiniń kenje qyzy Áliia Nazarbaeva Abai atyndaǵy opera jáne balet teatrynda "Mesto sily" kitabynyń tusaýkeserin ótkizdi.
"Almatynyń sanitariialyq-epidemiologiialyq baqylaý departamenti jáne basqarmalardyń mamandary monitoring toptarynyń quramyna kirmeidi. Sondyqtan monitoring toptary bizge jetkizgen aqparatty qarap, aiyppul sala alamyz. Óz betimizshe nysandarǵa barsaq, bul jemqorlyqqa ainalady", - dedi qalanyń bas sanitar dárigeri.
Jýrnalister Jandarbek Bekshinnen jappai jiyndy uiymdastyrǵan ári qatysqan tanymal adamdarǵa aiyppul salyndy ma dep surady. Mysal retinde prezidenttiń baspasóz hatshysy Berik Ýáli men Qazaqstannyń tuńǵysh prezidentiniń kenje qyzy Áliia Nazarbaevany atady.
Buǵan deiin jelide Doshan Joljaqsynovtyń 70 jyldyǵynda túsirilgen videolar tarady. Ol jerde Berik Ýáli Qaragóz Súleimenovamen birge bilep júr.
"Uiymdastyrýshylar men jiyn ótken nysan ielerine aiyppul saldyq. Biz tek qala boiynsha jumys istep jatyrmyz", - dep jaýap berdi Bekshin.
