Elimizde balalardyń sýǵa ketýiniń negizgi sebebi ata-ananyń qaraýsyz qaldyrýynan bolyp otyr. Bul týraly QR Tótenshe jaǵdailar ministrligi Azamattyq qorǵanys jáne áskeri bólimder komitetiniń basqarma basshysy Qanat Turysbaev málim etti, dep habarlaidy QazAqparat.
«Sý aidyndarynda balalardyń qaza bolý jaǵdaiynyń 82%-y ata-analardyń qaraýsyz qaldyrýy saldarynan bolyp otyr. Biyl eń kóp sýǵa ketý derekteri tirkelgen aimaqtarǵa toqtalsaq, aldymen Almaty oblysy – 45 adam, onyń ishinde 12 bala, ekinshi kezekte Shyǵys Qazaqstan oblysy – 36 adam, onyń ishinde 10 bala sýdan ajal qushty. Adamdardyń sýǵa ketip qaitys bolýynyń negizgi sebepterine toqtalyp ótsem. Shomylý kezinde kúshi men qabiletin baǵalamaý – 141 jaǵdai, mas kúiinde shomylý – 65 jaǵdai, sýǵa qulaý – 57 jaǵdai, júze almaý – 30 jaǵdai, balyq aýlaý kezinde qaýipsizdik qaǵidalaryn buzý – 12 jaǵdai, sýǵa batyp jatqan adamdardy qutqarý kezinde-12 jaǵdai jáne júzý quraldaryn paidalaný kezinde qaýipsizdik qaǵidalaryn buzý - 7 jaǵdai», - dedi dedi Qanat Turysbaev OKQ-de ótken baspasóz máslihatynda.
Sondai-aq, basqarma basshysynyń málimdeýinshe, shomylý maýsymy aiaqtalsa da sý aidyndarynda adam óliminiń aldyn alý boiynsha profilaktika jalǵasyp jatyr. Sebebi elimizde kúzgi ań jáne balyq aýlaý maýsymy bastalady.
