Jambyl oblysynda ózine qol jumsady dep boljanyp otyrǵan kelinshek jer qoinyna tapsyryldy. Qaitys bolǵan áieldiń týystary onyń óz-ózine qol jumsaǵanyna senbeitinin aitýda, dep habarlaidy ult.kz.
Marqumnyń janazasyna qatysqan jýrnalist áleýmettik jelidegi jazbasynda qaiynjurtynyń jerleýge kelmegenin málimdedi. Onyń aitýynsha, marqumnyń artynda 8 ailyq sábii qalǵan.
«Týystary ózin-ózi óltirdi degenge senbeidi», – dep jazdy ol.
Sondai-aq áleýmettik jelide marqumnyń qurbysyna qatysty túrli pikirler taraǵan. Alaida janazaǵa qatysqan avtor qurbysynyń marqumnyń otbasyna barynsha kómektesip júrgenin aitty.
Onyń sózinshe, qurbysy jerleý rásimin uiymdastyrýǵa atsalysyp, qajetti aqparattardy taratyp, marqumnyń anasyna qoldaý kórsetken.
«Tredsta qurbysyn qaralap jatqandar bar. Biraq ol qyz siiaqty shyryldap turǵan adam joq. Júgirip kómektesip, jan-jaqty aqparat taratyp júr. Qurbysynyń anasyna qoldaý bildirip, janynda turdy», – dep jazdy avtor.
Ol marqumnyń anasynyń qaiǵysyn jáne 8 ailyq sábidiń anasyn izdeitinin oilaýdyń aýyr ekenin atap ótti.
Jambyl oblysy politsiia departamentiniń málimetinshe, áieldiń ólimi boiynsha Qylmystyq kodekstiń ózin-ózi óltirýge deiin jetkizý babymen sotqa deiingi tergeý bastalǵan.
«Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan qajetti tergeý áreketteri júrgizilip jatyr. Qazaqstan Respýblikasy Qylmystyq-protsestik kodeksiniń 201-babyna sáikes, tergeý múddesine bailanysty ózge aqparat jariia etýge jatpaidy», – dep habarlady politsiia.
Tergeý nátijesinde áieldiń ólimine qatysty barlyq mán-jaiǵa quqyqtyq baǵa beriledi.
Aita keteiik, Jambyl oblysynda otbasylyq janjaldan keiin kelinshek ózine qol salǵan.
