Qazaqstandyq tanymal ázilkesh ári shoýmen Tursynbek Qabatov jańa qyzmetke taǵaiyndaldy, dep habarlaidy Sputnik Qazaqstan.
Ázilkesh áleýmettik jelidegi paraqshasynda birinshi qarashadan bastap 31 arnanyń oiyn-saýyq baǵdarlamarynyń prodiýseri qyzmetine kiriskenin jazdy.
"Ómirimniń órnegi – shyǵarmashylyq jolymnyń jańa belesine qadam basqaly otyrmyn. 1 qarashadan bastap Qazaqstannyń aqparat aidynynda orny bólek 31 arnanyń oiyn-saýyq baǵdarlamarynyń prodiýseri qyzmetine kirisemin. Jýyrda ǵana arna basshylyǵy aýysyp, Qurmanbek Jumaǵali bastaǵan zamanaýi kózqarasy bar mediamenedjerlerdiń jańa tolqyny keldi. Qazir ujymnyń qolǵa alyp otyrǵan joba-josparlary meniń de kóńilimnen shyqty", - dep jazdy Qabatov.
Ol aýqymdy telejobalardy iske asyrý týraly usynys túskende oilanbastan qabyl alǵanyn jetkizdi.
Patsha kóńildi kórermen kóńilinen shyǵamyz dep oilaimyn, dep túiindedi ol.
Aita keteri, jaqynda ǵana Qabatov tóńireginde taǵy bir shý shyqty. Tursynbek Qabatov pen onyń kómekshisi eki jyl buryn Qaraǵandy oblysynda bolǵan jáne adam ólimine ákep soqqan jol apaty boiynsha úkimmen kelispei, apelliatsiiaǵa berdi.
Jol apaty 2019 jyldyń qazanynda Nura aýdanyndaǵy Ahmet aýlynyń mańynda boldy. Lexus markaly kólik mingen Qabatovtyń kómekshisi 34 jastaǵy Erlan Omarqulovty qaǵyp ketti. Ol kóz jumdy.
Sot jesirdiń paidasyna sottalýshy jáne Tursynbek Qabatovtan 8 million teńge óndirý týraly qaýly etti. Iaǵni Tursynbek kóz jumǵan azamattyń artynda qalǵan jesirge tiisti somanyń jartysyn – 4 million teńge tóleýi kerek.
Sol qaiǵyly oqiǵa bolatyn kúni kólikti aidaǵan onyń kómekshisi óz kinásin moiyndamai otyr. Ol jábirlenýshi mas kúide qarańǵy ýaqytta jol ortasyna júgirip shyqty degen ýáj aitýda.
Tursynbek Qabatovtyń talaparyzyn sot alqasy keri qaitardy. Olardyń aitýynsha, azamattyq talaparyzdar boiynsha durys sheshim shyqqan.
Al onyń aldynda Tursynbek Qabatovtyń mektep bitirgen qyzy ulttyq biryńǵai testileýge ornyna basqa adamdy kirgizgeni belgili boldy. Alaida ázilkesh bul jaǵdaidan múlde beihabar bolǵanyn aityp, aqtaldy.
