Áleýmettik osal toptardan shyqqan 50 myńnan astam bala kolledjde oqý grantyn ielendi, dep habarlaidy BǴM baspasóz qyzmeti.
Ótken jylmen salystyrǵanda jeńildikter boiynsha oqýǵa túsken talapkerlerdiń sany 16 myńǵa artty. Bul kvota sanattarynyń tizimin keńeitýdiń nátijesinde múmkin bolyp otyr.
«Memleket basshysynyń tapsyrmasy boiynsha biyl alǵash ret azamattardyń áleýmettik osal toptarynan shyqqan balalardyń kolledjderge túsýi úshin kvotalar engizildi. Bul jetim balalar, ata-anasynyń qamqorlyǵynsyz qalǵan balalar, kópbalaly jáne tolyq emes otbasylardan shyqqan balalar, múgedek balalar, múgedek balalardy tárbielep otyrǵan otbasylardan shyqqan balalar, sondai-aq UOS qatysýshylary men múgedekterine jeńildikter boiynsha teńestirilgen adamdar. Sondai-aq kvota boiynsha memlekettik bilim granttaryn aýyl jastary da ielendi», – dep atap ótti QR BǴM Tehnikalyq jáne kásiptik bilim departamentiniń direktory Nasymjan Ospanova.
Biyl elimizdegi kolledjderge 9-11 synyptardyń 95 myńnan astam túlegi oqýǵa tústi. Ásirese, meditsinalyq jáne shyǵarmashylyq mamandyqtar suranysqa ie boldy.
Biyl kolledjderge qabyldaý 25 maýsymda bastalyp, 31 tamyzǵa deiin jalǵasty.
Granttar «aqsha stýdentpen birge júredi» qaǵidaty boiynsha bólindi, bul oryn alǵan jańashyldyqtardyń biri. Iaǵni, eger buryn-sońdy memlekettik tapsyrys oryndaryn kolledjder boiynsha komissiia bóletin bolsa, endi bul protsess barynsha ashyq bola tústi. Jańa erejege sáikes, talapker qai kolledjdi tańdasa, biýdjet qarajaty da sol oqý ornyna baǵyttalady.
Sonymen qatar eger buryn talapkerler tek 1 mamandyq pen 1 kolledjdi ǵana tańdai alsa, biyl túlekterge 4 mamandyq pen 4 kolledjdi tańdaý múmkindigi berildi.
Granttardy bólý aqparattyq júieler arqyly júzege asyryldy. Bul da ashyqtyqty qamtamasyz etýge baǵyttalǵan.
