Túrkiianyń 107 jastaǵy turǵyny Havahan Karadeniz SOVID-19 koronavirýsynan aiyqqan álemdegi eń qart áielderdiń biri boldy, dep habarlaidy Anadoly agenttigi.
Karadeniz myqty immýndyq júiesiniń arqasynda SOVID-19-dan bir aptanyń ishinde emdelip shyqty.
Qart áieldi Ystanbul ǵylymi-zertteý klinikasyna 7 sáýirde ornalastyrǵan. Ol qatty jótelip, dene qyzýy kóterilgen. 107 jastaǵy áielge koronavirýsqa jasalǵan test oń nátije kórsetti. Ol bir aptadan keiin aýrýhanadan emdelip shyqty. Qazir ol úiinde, 14 kúndik karantinde jatyr.
Aýrýhana qyzmetkerleri onyń qaýipti indetti tez jeńip shyqqanyna tańǵaldy. Dárigerlerdiń pikirinshe, áieldiń immýndyq júiesi myqty.
Karadeniz Malate provintsiiasynda Potiýrge aýdanynda týǵan. Ol 8 jasynda otbasymen birge Ystanbulǵa kóship kelgen. Onyń jubaiy 1982 jyly qaitys bolǵan. Karadenizdiń tórt balasy, 11 nemeresi jáne 15 shóberesi bar.
Keiýana óz jasyna qaramastan kún saiyn tańerteń erte turyp, namaz oqidy. Ol tamaqtanýǵa asa mán berip, tańǵy asqa sary mai, qaimaq, bal, sút paidalanady. Ájeidiń holesterin jáne qant deńgeii qalypty normada, ol táttiler men jemisterdi jaqsy kóredi. Áielge eshqashan ota jasalmaǵan, onyń este saqtaý qabileti jaqsy.
