Túrkiialyq fridaiver Shahika Erjúmen Antalianyń Kash aýdanynda teńizge 100 metr tereńge súńgip, álemdik rekord ornatty, dep habarlaidy QazAqparat Anadoly agenttigine silteme jasap.
Túrkiialyq sportshynyń súńgýin Shaban óńiriniń basshysy Arda Iazydjy men Kash mýnitsipalitetiniń basshysy Mýtlý Ýlýtash baqylap turdy.
Sportshy 100 metr tereńge eskekaiaq pen tútikshesiz 2 minýt 53 sekýnd túsip shyqty. Onyń aitýynsha, ol óz jeńisin Túrkiia Respýblikasy men Qarýly kúshteriniń 98 jyldyǵyna arnaǵan.
«Men tereńge súńgi alǵanym úshin qýanyp turmyn. Osy álemdik rekord arqyly jurtshylyqtyń nazaryn klimattyq krizis, jahandyq jylyný jáne genderlik teńdik siiaqty máselelerge nazar aýdarǵym keldi», - dedi Erjúmen.
