Túrkiia Respýblikasyndaǵy tabiǵi órtterdi sóndirýge attanǵan QR Tótenshe jaǵdailar ministrliginiń qutqarýshylary óz missiiasyn sátti aiaqtady, dep habarlaidy "Ult aqparat" ministrliktiń baspasóz qyzmetine silteme jasap.
Resei, Ázerbaijan, Grýziia, Ýkraina, Polsha, Avstriia, AQSh, Belarýs, Iran, Ispaniia jáne Shveitsariia siiaqty memleketterdiń basqa ekipajdarymen birge Dalaman qalasynyń mańyndaǵy órtter tolyǵymen joiyldy.
Orman alqabyna jaiylǵan órtti sóndirý úshin qazaqstandyq qutqarýshylar 8 táýlik boiy aýqymdy jumys atqardy. 16 qutqarýshy men eki tikushaqtan quralǵan arnaiy top jalpy kólemi 300 tonnadai bolatyn 80 tsikldy sý shashty. 18 tamyzdaǵy jaǵdai boiynsha bekitilgen aýmaqta órt tolyq sóndirildi.
QR TJM arnaiy tobynyń jeke quramy olardyń aldyna qoiylǵan mindetterdi tolyq kólemde oryndady jáne búgingi kúni qazaqstandyq ekipaj uzaq qashyqtyqta ushýǵa daiyndalýda. 20 tamyz kúni Túrkiia ýaqyty boiynsha tańǵy saǵat 06:00-de Dalaman qalasynyń ákimdigi jáne Túrkiia Respýblikasy Aýyl jáne orman sharýashylyǵy ministrliginiń ókilderi qazaqstandyq qutqarýshylardy shyǵaryp salady dep josparlanǵan.
Esterińizge sala keteiik Memleket basshysy Qasym-Jomart Toqaevtyń tapsyrmasy boiynsha túrik halqyna baýyrlas jáne gýmanitarlyq kómek aiasynda QR Tótenshe jaǵdailar ministri Iýrii Ilinnyń buiryǵymen quramynda 16 qutqarýshysy bar eki MI-8 AMT tikushaǵy kómekke attanǵan bolatyn. Olar úsh memlekettiń shekarasyn basyp ótip, Kaspii teńizi men Qara teńizdiń ústimen Kavkaz taýlary arqyly 4500 shaqyrym jer júrip Túrkiia Respýblikasyna jetken bolatyn.
