Túrkiiada Qara teńiz jaǵalaýynda sel bolyp, kemi 57 adam qaitys boldy. Bul týraly 14 tamyz kúni eldiń tótenshe jaǵdai agenttigi habarlady.
Ótken aptada eldiń soltústik bóliginde toqtaýsyz jaýyn jaýyp, arty sý tasqynyna ulasty. Tabiǵi apattan Kastamoný, Sinop jáne Bartyn provintsiialary qattyraq zardap shekti. Sel úilerdi qiratyp, kólikterdi shaiyp áketip, kóptegen joldy jaramsyz etken.
Túrkiia tótenshe jaǵdai agenttiginiń málimetinshe, Kastamonýda 48 adam, Sinopta segiz, Bartynda bir adam qaza tapqan, segiz adam aýrýhanaǵa túsken.
Kastamoný provintsiiasynyń ishki ister ministri Sýleiman Soilý 77 adamnyń iz-tússiz joǵalǵanyn aityp, joǵalǵandar sany júzden asady dep aqpar taratqan oppozitsiia partiialaryn, áleýmettik jeli qoldanýshylaryn jáne baspasóz quraldaryn aiyptai sóiledi.
Sinopta sý tasqyny Babadjai aýylyn túgel shaiǵan. Ózen boiyndaǵy bes qabatty turǵynúi, 40 jeke úi jáne eki kópir qirady dep habarlaidy "Anadolý" agenttigi. Qutqarýshylar áýede tikushaqpen, jerde arnaiy daiyndalǵan itterdiń kómegimen joǵalǵan adamdardy izdestirip jatyr.
Shamamen 2250 adam evakýatsiialanǵan. Ondaǵan adamdy úiiniń tóbesinen tikushaqpen alyp ketken. Apattan aman qalǵandar jergilikti bilikke shúiligip, apat týraly aldyn ala eskertpegeni úshin sógip otyr.
Nóserli jaýyn Qara teńizdiń arǵy jaǵyna jetip, Reseidiń ońtústik aýdandaryna da sý tasqynyn ákelgen. Krasnodar ólkesiniń ákimshiligi 14 tamyz kúni 1400 úidiń shaiylyp ketkenin málimdedi. Ólkeniń tótenshe jaǵdai basqarmasy 1530 adamnyń evakýatsiialanǵanyn habarlady. Apattan eń qatty zardap shekkeni – Qara teńiz boiyndaǵy Anapa kýrorty. Bilik ókilderi jaýynnyń áli eki kún jaýatynyn aitady.
