Foto: instagram.com/trthaber
Keshe Túrkiianyń Hatai provintsiiasynda bolǵan jer silkinisinen zardap shekkender sany artty. Bul jaiynda eldiń densaýlyq saqtaý ministri Fahrettin Qoja málim etti, dep habarlaidy QazAqparat.
«Búgin keshke Hataida bolǵan eki jer silkinisinen 294 adam jaraqat aldy. Ókinishke qarai, onyń ishinde 18 naýqastyń jaǵdaiy aýyr. Alǵashqy meditsinalyq kómek kórsetilgennen keiin olar Adana jáne Dertiol qalalaryna jetkizildi. Bizdiń barlyq dalalyq aýrýhana patsientterimizge tiisti qyzmet kórsetýdi jalǵastyryp jatyr», - dep jazdy ministr Twitter paraqshasynda.
Onyń aitýynsha, Hatai ýniversitetiniń meditsina fakýltetinde jáne Iskenderýn men Reihanly memlekettik aýrýhanalarynda jatqan jalpy sany 95 patsient eki jańa jer silkinisinen keiin saqtyq sharasy retinde Adana men Dertiol aýrýhanalaryna aýystyrylǵan.
«Bizdiń dalalyq aýrýhanalar Hataida kezekshilik etedi», - deidi ol.
Aita keteiik, dúisenbi kúni Hatai qalasyna qarasty Defne aýdanynda 6,4 magnitýdalyq jer silkinisi tirkelgen edi. Keshirek qýaty 5,8 magnitýdaǵa jetetin taǵy bir jer silkinisi boldy. Onyń saldarynan 3 adam qaza tapqan.
Túrkiianyń Hatai qalasyna qarasty Defne aýdanynda jer silkinisi eki ret qaitalanǵan soń Antakiia men Iskenderýn qalalarynyń arasyndaǵy jol buzyldy. Búlingen ǵimarattar da bar ekeni aitylyp jatyr.
Jalpy, osy aqpanda Túrkiianyń 10 óńirinde bolǵan jer silkinisinen 41 myńnan asa adam kóz jumdy.
