Tótenshe jaǵdailar ministrligi Telegram-arnasynda Túrkiiadaǵy jer silkinisi saldarynan búlingen úilerdiń konstrýktsiialaryn demontajdaý jáne izdestirý-qutqarý jumystarynan jedel kadrlar jariialandy, dep habarlaidy "Ult aqparat".
Vedomstvo málimeti boiynsha, videoda qazaqstandyq qutqarýshylar túrkiialyq áriptesterimen birge qutqarý jumystaryn júrgizip jatyr.
"Túrkiiaǵa kelgen qazaqstandyq qutqarýshylar kúrdeliligi joǵary nysandarǵa bekitilgen bolatyn. Ótken táýlikte birinshi top óte kólbeý kelgen alty qabatty úidi zerttedi, úi shógip jatyr, qutqarýshylar qiyn jaǵdaida jumys isteýde. Bloktan shyǵarý jáne úige kirý júrgizildi, izdestirý kezinde qaza tapqan 3 áieldiń denesi tabylyp shyǵaryldy, úiindilerdi tazartý, qurylys konstrýktsiialaryn shyǵarý júrip jatyr.
Ekinshi top tolyǵymen qiraǵan 9 qabatty eki úidi zerttedi, sonymen qatar jergilikti qutqarýshylarmen birge tiri adamdy - zardap shekken áieldi shyǵaryp aldy. Osy nysanda qutqarýshylar 1 adamnyń denesin tapty", - delingen habarlamada.
Qirandy ornynda kúrdeli jaǵdai qalyptasqan. Qutqarýshylar úiindiler arasynan adamdardy jyldam izdestirý úshin barlyq qajetti sharalardy qabyldap jatqany aitylǵan. Jumystar táýlik boiy júrgizilip jatyr.
